Руската војска вчера започна вежби со тактичко нуклеарно оружје, нешто што беше најавено од страна на руските власти во текот на месецов, како очигледно предупредување до високите западни претставници кои зборуваа за можноста за подлабоко инволвирање во војната во Украина, пренесува Асошиејтед Прес.
Ова е првпат Русија јавно да објави вежби со тактичко нуклеарно оружје, иако нејзините стратешки нуклеарни сили редовно одржуваат вежби од овој вид.
Според соопштението на Министерството за одбрана, објавено во вторникот, првата фаза од новите вежби предвидува „практична обука за подготовка и употреба на нестратегиско нуклеарно оружје“, вклучувајќи ги и ракетите Кинжал и Искандер со нуклеарни капацитети.
Маневрите се одржуваат во Јужниот воен округ, кој се состои од руски региони на југ, вклучително и на границата со Украина, потоа Крим, незаконски анектиран од Украина во 2014 година, и четири украински региони кои Русија незаконски ги анектираше во 2022 година и делумно ги окупираше.
Вежбите беа најавени на 6 мај, а Министерството за одбрана во соопштението потврди дека тие ќе бидат одговор на „провокативните изјави и заканите на одредени западни претставници во однос на Руската Федерација“.
