Министерството за внатрешни работи во текот на вчерашниот ден продолжи со засилените акциски контроли во областа на сообраќајот. На територијата на град Скопје во текот на вчерашниот ден изречени се вкупно 400 санкции, информираат од МВР.

Полициските службеници вчера напишале 65 казни за пречекорување на дозволената брзина на движење и 47 прекршоци за технички неисправни и нерегистрирани возила. Исто така изречени се 14 прекршоци за возачи кои поминале на затворен семафор, како и 28 санкции за некористење на сигурносен појас. Воедно санкционирани се 15 мотоциклисти.

Полицијата вчера изрекла 51 мерка за непрописно паркирање и 36 казни за неносење на заштитна маска. Вчера 48 возила биле подигнати со „пајак“.

Од МВР најавија дека во наредните денови ќе продолжат со засилените акциски контроли. Оттаму апелираат до граѓаните да ги почитуваат сообраќајните правила и прописи, со цел да се зголеми безбедноста во сообраќајот.