Покрај пожарите кои веќе цела недела не се игаснати кај Ново село и на планината Серта, сериозни пожари има и во близина на населените места Чашка, Долнени, Студенични, Зелениково и под Солунска глава. Ова го изјави утрово директорот на Центарот за управување со кризи (ЦУК), Стојанче Ангелов кој додаде дека засега нема опасност за ниту едно населено место. Тој во видео изјава кажа дека одржале брифинг со пилотите на хеликоптерите кои гасат на различни локации.
„Четири хеликоптери полетаа на планината Серта близу Радовиш кај селото Колајево, таму има два големи армиски хеликоптери, еден полициски и еден црногорски хеликоптер. Кај Гевгелија кај Негорци има два хеликоптери од Словенија, а кај Ново Село упативме еден хеликоптер од Турција и од Србија. Откако зема замав пожарот кај Радовиш, српскиот хеликоптер го пренасочивме кон Радовиш“, вели Ангелов.
Тој информира дека пожарот кај Солунска глава се шири на тешко пристпен терен и дека затоа таму ќе оди романски хеликоптер кој ќе фрли 5 тони вода во еден налет.
„Водните бомби се опасни за луѓето на земја, затоа и нема пожарникари долу да гасат од земја. Во гасењето на пожарите низ државата учествуваат 100 припадници на АРМ и 30 припадници на полицијата. Но, теренот е тешко пристапен и тешко може да му се пристапи од земја, затоа и се оди на гасење од воздух“, додава Ангелов.
