Заканите кон новинарката Рита Бехадини, кои на „Фејсбук“ лани ги упати 31 годишен жител на Грчец според членовите 144 од Кривичниот законик, стасаа на ред во Основното јавно обвинителство (ОЈО). Оттаму информираат дека доставиле обвинителен предлог против лицето, за кривично дело – Загрозување на сигурноста од член 144 став 5 во врска со став 4, како и ставовите 1 и 2 од Кривичниот законик.
„Обвинетиот сериозно ѝ се заканувал на една оштетена дека кон неа ќе изврши кривично дело, за кое е пропишана казна затвор од пет години или потешка казна. Заканите ги упатувал поради нејзиниот општествен статус како новинарка, а во врска со вршењето на нејзините професионални задачи кои ги презела во рамките на своите овластувања“, наведено е во соопштението на Обвинителството.
Како што оттаму информираат, со намера да ја вознемири и исплаши, тој упатувал заканувачки пораки кон новинарката преку лажен профил, барајќи од неа да избрише текст што го напишала и објавила, со што кај оштетената предизвикал чувство на загрозување, несигурност и страв.
„По издадени наредби на јавен обвинител, МВР го идентификуваше сторителот на кривичното дело, за кое согласно Кривичниот законик е предвидена затворска казна од една до пет години. Со ова, од вкупно пет регистрирани напади врз новинари и медиумски работници во текот на 2023 година за кои алармираше Здружението на новинари на Македонија, во три случаи сторителот е идентификуван и е поведена постапка. Од нив, во два предмети, врз основа на поднесените обвиненија, веќе е изречена и пресуда против сторителите на кривичното дело“, се додава во соопштението.
За овој случај лани реагираше и Здружението на новинари на Македонија (ЗНМ). Оттаму побараа итна реакција за експлицитните закани и потсетија дека е издаден Протокол за безбедност на новинарките на интернет, кој содржи чекори за тоа, како да постапуваат новинарите кога ќе се соочат со закана на Интернет.
