На радост на сите гејмери, Кристијан Трајковски, заедно со гејм дизајнерот Марко Зарев и арт директорот Симон Стојановски од студиото Dark-1 веќе четири години работат напорно на создавањето на играта која ќе ги израдува сите фанови на скопската бруталистичка архитектура, но и на борбените видео-игри. Мета.мк разговараше со програмерот Трајковски, кој ни даде голем број интересни информации за процесот на изработка на оваа игра.
Македонското гејминг студио Dark-1 кон средината на септември издаде демо на играта „Скопје“ на платформата Steam. Би можеле ли накратко да ни го опишете самиот историјат на развојот на оваа игра?
Кристијан Трајковски: Играта е започната пред четири години како проект поддржан од Фондот за иновации и технолошки развој (ФИТР). Од тогаш константно работиме редовно со цел тим за да ја довршиме оваа игра. Поминаа четири години, играта напредува, меѓутоа демо е единственото нешто кое досега го имаме завршено и прикажано пред светот. Ова демо беше прикажано на настанот PAX West, којшто се одржува секоја година во Сиетл и е еден од најголемите настани за видео игри во светот.
Од она што успеавме да го дознаеме, во играта „Скопје“ има мотиви од бруталистичката архитектура на Скопје, но и југословенска типографија. Од каде ви дојде инспирацијата за вакво нешто и што мислите дека би поттикнале кај гејмерите со ваквата тематика?
Кристијан Трајковски: Оваа средина – типографијата и архитектурата се нешто коешто ретко го гледаме во видео игрите и сметаме дека ќе биде едно многу интересно искуство и уникатно за нашите играчи. Инспирацијата ја вадиме од нашиот секојдневен живот, сите сме израснати во овој град и сите знаеме како се развива. Сите најважни објекти од бруталистичката природа од градот се вклучени – Поштата, Железничката станица, Студентскиот дом „Гоце Делчев“, УКИМ и уште многу други градби.
Каков е досегашниот пат на успехот на играта „Скопје“ низ светот, кои се најзначајните достигнувања на кои сте горди како девелопери на оваа игра?
Кристијан Трајковски: Како што кажав и претходно, играта е започната како проект од ФИТР. Откако заврши проектот, имавме игрива верзија со која што започнавме да бараме издавач. Успеавме да најдеме американски издавач PM Studios, којшто е заинтересиран да ја издаде нашата игра. Со нив работиме заедно околу две години и благодарение на нив успеавме нашата игра да ја пласираме на PAX West. На PAX West имавме едно огромно изненадување, затоа што на луѓето општо многу им се допаѓаше виртуелно како изгледа играта, стоеја во ред за да ја пробаат играта. Генерално, сите коишто ја играа играта, речиси од сите имавме позитивен фидбек. Немаше страшни проблеми, играта беше игрива, им се допаѓаше на луѓето таму.
Кои се следните чекори од промоцијата на играта „Скопје“ во наредниот период и какви се досегашните реакции на гејмерите за неа?
Кристијан Трајковски: Играта е достапна на Steam, меѓутоа е достапна само за да се додаде во Wishlist. Тоа ни е главниот начин на којшто собираме луѓе коишто ја следат играта и потенцијални купувачи. Од аспект на промоција, за тоа ќе одлучи издавачот, меѓутоа се надевам дека што е можно поскоро ќе биде достапна на пазарот.
Кај нас гејмингот понекогаш се разбира од општеството како губење време особено на младите, иако Македонската Е-спорт Федерација и нашите девелопери имаат респектабилен рејтинг во меѓународни рамки во однос на гејмингот. Како би одговориле на предрасудата дека гејмингот е губење време на младите?
Кристијан Трајковски: Истиот начин како што филмовите се губење време и игрите се начин на разонода, меѓутоа губење време на забавен начин. Тоа е главниот начин којшто ќе кажам дека луѓето коишто играат не си го трошат времето, туку си го користат за нешто коешто им е ќеиф да го прават. Меѓутоа, треба да се прави во некакви разумни граници. Ако седите и читате книги цело време, и тоа не е најдобра работа. Сè што е во нормални рамки е во ред, од друга страна, Е-спорт Федерацијата и општо Е-спортот е нешто сосема различно. Тие луѓе не играат за разонода, туку професионално и затоа што знаат дека од тоа може да заработат. Од трета страна, гејм девелопментот е нешто коешто е различно. Ние како девелопери нашата игра не ни можеме да ја играме, секој ден сме со неа и веќе губиме чувство за тоа што е нашата игра. За нас тоа е повеќе како професионална определба.
Имате ли некаква порака до младите што би сакале да ја испратите во поглед на вашата игра и во однос на гејмингот?
Кристијан Трајковски: Ако се заинтересирани за гејм девелопмент, тоа е еден многу тежок и макотрпен пат којшто треба да се изоди. Ние веќе работиме заедно 10 години со оригиналниот тим којшто го започна Dark-1. Тоа беше многу тешко искачување нагоре, константно имавме некакви временски проблеми, развојот на игри одзема неверојатно долго време, веќе споменав дека на „Скопје“ работиме веќе четири години и е потребно многу знаење од многу работи. Тоа е сепак една спојка од голем број на активности – програмирање, уметност, цртање, 3Д моделирање, звучен дизајн, музика. Едноставно, многу работи се заедно коишто треба да функционираат за да имате на крајот убава игра. Потребно е многу време и е потребен тим за да се направи нешто солидно. Ако сакате да бидете гејм девелопер, да знаете дека може да се направи, ама е тежок патот. За сè останато, уживајте во игрите.
