Сите општини можат да одлагаат отпад во ЈП „Дрисла“ и за тоа да им се изработи фактура и да им се наплати, како што било и досега, рече денеска градоначалникот на Кисела Вода, Орце Ѓорѓиевски, по најавите дека општината ќе добие казна од над 85 илјади евра. Казната следува откако во неделата, а по сериозниот застој со одлагањето на сметот поради штрајкот во ЈП Комунална хигиена Скопје, градоначалниците на Кисела Вода и Аеродром, Ѓорѓиевски и Тимчо Муцунски, со камиони од општината и со друга зајмена механизација собираа смет од своите општини, но ЈП „Дрисла“ одби сметот да биде истурен на депонијата, по што градоначалниците донесоа одлуки тој да се истури пред претпријатието.
Случајот „Комунална хигиена“ на виделина го извади сето ѓубре
Ѓорѓиевски вели дека нема да ја плати казната, а градоначалничката на Град Скопје, Данела Арсовска, тврди дека тој е „функционално неписмен и нема основна култура на однесување“.
„Додека се спречуваше камионите од Кисела Вода и Сопиште да одложат отпад, возила со италијански таблички, но и други беа пропуштани, значи селективно. По неколку пати повикување од разумност, да го внесеме отпадот во Дрисла, значи отпад да внесеме, не ни беше дозволено. Првата опција беше да го истовариме пред вратите, а втората опција беше отпадот да биде вратен во Кисела Вода, можеби и тоа ѝ беше целта на Арсовска“, рече Ѓорѓиевски додавајќи дека нема никаква намера да ја плати казната.
„Ниту еден денар нема да биде платен и секој мој чекор, како и досега, ќе биде во интерес на моите сограѓани. Јас сум добил поддршка и го штитам нивниот интерес“, рече Ѓорѓиевски.
Тој рече дека Арсовска лаже дека општината Кисела Вода нема договор со ЈП „Дрисла“, покажувајќи им на новинарите влезни фактури од последниот месец.
„Општините си одлагаат отпад, за тоа им се изработува фактура и им се наплаќа. Ова се влезните фактури, конкретно за јуни“, рече Ѓорѓиевски, додавајќи дека и Општина Сопиште била казнета за истото, со над 50.000 евра за одложување отпад на јавна површина.
Наспроти ова, Арсовска тврди дека градоначалникот на Кисела Вода е „функционално неписмен“ и дека општината нема никаков договор со „Дрисла“.
„Напротив, барањето за склучување на договор е испратено до ЈП Дрисла вчера на 11.07.2023 година. Договор има компанијата „Анизор“ која е ангажирана преку тендер од страна на општина Кисела Вода за одлагање на отпад во ЈП „Дрисла“ со која никогаш немало никаков проблем. Но, би сакале да го потсетиме Ѓорѓиевски дека вечерта кога го истураше отпадот пред ЈП „Дрисла“ самиот изјави дека тој чин го прави под „целосна сопствена одговорност“. Оттука, срамно е да плаче на прес-конференции и да се жали, наместо тоа, нека остане барем на едно ветување дадено пред јавноста – овој пат наместо да глуми храброст пред камери, нека ја докаже“, се вели во соопштението на градоначалничката на Град Скопје.
Проблемот со ѓубрето се претвори во политички натпревар за односи со јавност
