Четири лица, меѓу кои и деветгодишно девојче, се повредени во рускиот ракетен напад врз областа Константинивка во украинскиот регион Донецк што се случи утрово, објави украинската државна новинска агенција „Укринформ“.
Руските напаѓачи лансирале крстосувачка ракета „Искандер“ околу 6 часот и 25 минути утрово, при што мета била станбена зграда. Во експлозијата биле повредени четири лица – 9-годишното девојче, нејзината 44-годишна мајка, 64-годишна жена и нејзиниот 41-годишен син.
Според извештајот на украинските институции, како последица од нападот, цивилите се здобиле со модринки и потрес на мозокот.
Во рускиот напад во областа Херсон во јужна Украина, пак, повредени се 27-годишна жена и нејзиното деветмесечно бебе, пренесува „Гардијан“. Жената и доенчето биле хоспитализирани со умерени рани, а во нападот бил повреден и лекар од Црвениот крст, информираше гувернерот на регионот, Олександр Прокудин. Оштетени биле неколку куќи и гасоводот.
Во текот на изминатото деноноќие, руските трупи гранатирале пет области и во Харкив.
Укринформ информираше и за 133 руски напади врз над дваесет населени места во регионот Запорижја.
