Ципрас лобира кај Пахор: Отсега нашиот сосед да го викате „Северна Македонија“


Atina, 4 декември, 2018 - 16:23 (META) 

Грчкиот премиер Алексис Ципрас на денешната средба во претседателската палата во Атина со словенечкиот претседател Борут Пахор изразил задоволство што кај „северниот грчки сосед“  бргу напредува на планот на уставните измени.

Истовремено, Ципрас лобирал кај словенечкиот државник дека „земјата која сега ја нарекува според уставното име, односно како Македонија, во иднина ќе треба да ја викаат „Северна Македонија“.

Ципрас се пофалил дека на Балканот Грција преку иницијативи работи на подобрување на соработката, но најбитно „преку многу важниот договор потпишан со БЈРМ во 2018 година, известува грчкиот весник „Катимерини“.

– Тоа значи дека Вие, и Словенија, која е една од земјите што ги признаваат нашите соседи под нивното уставно име, односно „Македонија“, отсега ќе ја признавате и ќе ја нарекувате „Северна Македонија“, оти тоа е многу важно за грчкиот народ, бидејќи Македонија, освен што е голема географска област во Грција, регион на Грција, е исто така важен дел од древната грчка историја, а тоа се признава во овој договор, за кој се надевам дека е со изедначена согласност на двете страни – му рекол Ципрас на словенечкиот претседател.


За руската агенција „Спутњик“ земјава е „С. Македонија“


Скопје, 24 октомври, 2018 - 11:57 (META) 

Руската новинска агенција „Спутњик њус“, порано позната како „РИА Новости“ и „Гласот на Русија“ веќе ја преименува Република Македонија во Северна Македонија.

Со наслов „Грција, С. Македонија, почнаа да разговараат и покрај идентитетскиот конфликт“ руската агенција која е дел од владиниот медиумски конзорциум „Росија Сегодња“, во понеделникот објави интервју со професорот Неофитос Лоизидес од универзитетот на Кент, Велика Британија за најновите случувања околу Договорот со Грција и деценискиот спор на двете земји, а во насловот земјава ја наведе како „С. Македонија“.

Со оглед на фактот дека станува збор за државна новинска агенција, која е директно под капата на руската влада, преименувањето би можело да се сфати како сигнал на официјалната руска политика дека уставните измени во македонското Собрание се веќе готова работа, и Македонија ќе го прифати името Северна Македонија, како главен сегмент на Договорот од Преспа.


Загубени 25 години, резултатот е ист


Скопје, 25 септември, 2018 - 10:53 (META) 

Последниве месеци се дебатира за терминот Северна Македонија како компромисно решение за името по потпишувањето на договорт со Грција. Тој предлог, сепак, не e ниту нов. Ниту првпат предложен.

Факсимил од насловната страница на весникот „Нова Македонија“, од 7 март 1993 година, го покажува насловот „Северна Македонија“ прифатливо за Грција?“ .

Од тогаш минаа 25, според некои, неповратно загубени години, а резултатот од преговорите е ист.


Коѕијас: Договорот ќе биде ратификуван, Грција го доби името назад


Атина, 7 септември, 2018 - 12:25 (META) 

Договорот од Преспа ќе го донесе нашата влада во Парламентот и ќе биде изгласан со апсолутно мнозинство, од над 150 пратеници, порача министерот за надворешни работи Никос Коѕиас во интервјуто за грчкото радио „Риал фм“.

Тој тврди дека Грција добила многу повеќе отколку нашата земја, која ќе мора да направи крупни промени, но и потоа сè ќе зависи од Грција.

– Иако соседната земја ќе одржи референдум, ќе направи уставни измени и ќе го смени името, таа ќе продолжи да зависи од Грција, бидејќи без грчкото ратификување на Договорот од Преспа, нема да стане членка на НАТО – вели Коѕиас.

Зборувајќи за позицијата на Македонија, тој исто така се пофали дека придобивка за Грција е што земјата повеќе нема да се вика Македонија, туку Северна Македонија, и со тоа актуелната власт „го добила името назад“.

– Многу од моите колеги велат дека не ја нарекувале „Македонија“ во изминатите 15 години. Благодарение на нашата влада, таа земја и Американците ќе ја нарекуваат „Северна Македонија“. Три четвртини од светот, за жал, ја признаа соседната земја како Македонија и за среќа со овој договор таа ќе стане Северна Македонија“. Затоа ние тврдиме дека го добивме името назад, а не сме го дале, како што велат некои – вели шефот на грчката дипломатија.

Зборувајќи за противењето на коалицискиот партнер во владата, Панос Каменос, за ратификацијата на Договорот, тој вели дека тоа нема да биде пречка, оти се знае како се донесуваат одлуките во владата.

– Имам предвид што вели коалицискиот партнер во владата, но одлуките во владата се носат од мнозинство и многу е јасно кој го изразува апсолутното мнозинство. Коалицискиот партнер е секогаш многу продуктивен и корисен, за ова прашање има негови позиции, сака да ги искажува, тоа е негово демократско право. Но, повторувам уште еднаш, грчката Влада ќе го донесе договорот во Парламентот, во Парламентот има мнозинство и ова го кажав уште лани, дека нема да се изгласа од мнозинство партии, туку од мнозинство пратеници – вели Коѕиас.


Ахмети: Албанците се на нивното место и во нивната држава


Скопје, 29 јуни, 2018 - 9:34 (META) 

Во Република Македонија, живеат Македонци, Албанци, Турци, Срби, Власи… Ние сме дел од Уставот на РМ и нема никаква дилема дека Албанците се во нивното место и во нивната држава, рече вчера претседателот на ДУИ, Али Ахмети, во емисијата „Патот кон“ на Алсат-М, одговарајќи на новинарско прашање, дали името Република Северна Македонија го одразува и идентитетот на сите Албанци.

Тој појасни дека имал серија средби со грчките власти, вклучувајќи ги и министрите за внатрешни работи на Грција во изминатите 10 години и дека инсистирал на барањето да не прекинат односите меѓу Македонија и Грција и да не се продлабочи јазот, туку да се изнајдат заеднички позиции и дека ги убедил оти нема никаков проект за промена на границите во регионот.


Захариева: Наредната недела зелено светло за преговори на Македонија со ЕУ


Софија, 18 јуни, 2018 - 11:49 (META) 

Вицепремиерката и министер за надворешни работи на Бугарија, Екатерина Захариева изјави дека по постигнатиот договор за името Северна Македонија, Советот за општи прашања на ЕУ со кој таа претседава, во почетокот на наредната недела би можел да даде зелено светло за почеток на пристапните преговори со Скопје.

– На состанокот на Советот ќе се расправа за темата проширување. Ако Советот даде зелено светло, решението може да биде потврдено на состанокот на Европскиот совет на 29 и 30 јуни – рече Захариева во интервју за бугарската Нова ТВ.

Шефицата на бугарската дипломатија вели дека ентузијазмот за проширување кај некои членки не е голем, но нагласи оти Македонија заслужува и оти треба да и се даде јасна перспектива.

Захариева повтори дека национален интерес на Бугарија е стабилна Македонија и стабилни соседи кои чекорат кон НАТО и членство во ЕУ.

Шефицата на бугарската дипломатија смета дека договорот меѓу Македонија и Грција нема на никаков начин да го наруши спроведувањето на Договорот за добрососедство меѓу Софија и Скопје.


Уапсени 25 демонстранти, повредени седум полицајци на протестите пред Собранието


Скопје, 18 јуни, 2018 - 9:24 (META) 

Во синоќешните протести пред Собранието биле повредени седум полицајци а приведени се 25 демонстранти, соопшти МВР, најавувајќи повеќе детали за денеска.

„На вчерашниот јавен протест во Скопје, дел од демонстрантите употребија распрскувачки средства и насилно ја турнаа заштитната ограда, истовремено обидувајќи се насилно да влезат во Собранието. Со цел да се спречи ескалирање на ситуацијата и насилен упад во Собранието, а постапувајќи согласно процедурите, полицијата употреби солзавец“, соопшти МВР.

Министерството нагласува дека го почитува правото на мирен протест, но нема да дозволи употреба на сила и насилен упад, како и нарушување на јавниот ред и мир и апелира на демократски начин на изразување на јавното мислење.

Протестите беа организирани преку социјалните мрежи поради догворот кој вчера го потпишаа Македонија и Грција, за решавање на 27-годишниот спор за името, со кој името на Македонија ерга омнес треба да биде Северна Македонија.


Мицотакис: Грција прв пат признава македонска националност и јазик


Атина, 14 јуни, 2018 - 15:00 (META) 

Грција, по прв пат признава македонска националност и јазик за нашите северни соседи. Елементи што претставуваат корен на иредентизмот, рече лидерот на опозициската Нова демократија Киријакос Мицотакис на денешната расправа во грчкиот парламент, кусо пред да достави барање за гласање недоверба на владата на премиерот Алексис Ципрас.

Како што јави дописничката на МИА од Атина, Мицотакис упати остри обвинувања до Ципрас за содржината на договорот, особено за делот со јазикот и националноста, велејќи дека „државата добива географска одредница, не народот“.

– Можете да ми кажете, зошто со вашиот договор, жителите на Северна Македонија ќе се викаат едноставно Македонци и ќе говорат македонски? – го праша Мицотакис, Ципрас и го повтори неговиот став дека „прифаќањето македонски јазик и македонска националност се неприфатлива национална отстапка“.

Лидерот на Нова демократија го обвини Ципрас дека лаже и во однос на тоа дека новото име, Северна Македонија, Грција ќе го употребува без превод на грчки јазик, односно како што се изговара на македонски, бидејќи такво нешто нема во објавениот договор.


Мицкоски: Договорот на Заев е капитулација, ВМРО-ДПМНЕ нема да го поддржи


Скопје, 12 јуни, 2018 - 22:13 (META) 

Ако постигнатиот таканаречен договор на Зоран Заев е прифаќање на промена на уставот, и внатрешна и надворешна употреба на новото име, тогаш тоа е договор на Зоран Заев за капитулација, рече Христијан Мицкоски, лидерот на ВМРО-ДПМНЕ вечерва на прес-конференцијата веднаш по обраќањето на премиерот на која ја соопшти веста за постигнатиот договор за името.

– Зоран Заев покажа нестабилност, недостоинственост, покажа и континуирана променливост на сопствените лични ставовите, недостоинствено за премиер на држава. Ставовите на ВМРО-ДПМНЕ се познати, непроменети и прецизни. ВМРО-ДПМНЕ нема да отстапи од своите принципи и уверувања и нема да поддржи промена на Уставот – рече Мицкоски нагласувајќи дека „доколку Зоран Заев се обиде шверцерски капитулацијата да ја протне низ собраниска процедура, мора да знае дека референдум мора да има, и тој мора да биде задолжителен, а не консултативен како што се обиде повторно денеска шверцерски на прес конференција да и го протне на македонската јавност“.

Според него, штетата што сега се прави е огромна и државата се турка во неповратен амбис.

– Ние сме за ЕУ и НАТО членство, многу повеќе од сите други, но напредокот и интегрирањето таму мора да биде ценето по мерит систем т.е. по сработената работа, а не по предавствата и капитулациите како што денеска Зоран Заев се обиде да им ги претстави на македонската јавност. Со ваквите договори како денес Македонија губи – рече Мицкоски и нагласи дека тој ќе гласа „против“ на најавениот референдум.


Заев: Нема веќе ФИРОМ, договорена е Република Северна Македонија


Скопје, 12 јуни, 2018 - 19:41 (META) 

Република Северна Македонија преведено на сите јазици е името што попладнево на прес-конференција го потврди премиерот Зоран Заев како решение на спорот со Грција.

Според Заев македонски јазик, Македонец, Македонка се заштитени и зајакнати „еднаш за секогаш“.

“Име кое е достоинствено, Републикa Северна Македонија со превод на сите јазици за севкупна употреба се прецизира со амандман во Уставот, потврда на македонскиот јазик македонски, Macedonian без фуснота, националноста е македoнска/граѓани на Северна Македонија”, рече Заев.
Тој повика на национално обединување и најави дека договорот наесен ќе оди на референдум, а потоа ќе се ратификува во Парламентот.

„Имаме историско вековно решение. Решавајќи го спорот, градиме пријателство со Грција, кое никогаш не било поголемо. Во нашите раце е клучот за отворање на европската перспектива. Решаваме два и пол децениски спор за да ја извлечеме нашата земја, која одеше надолу. Со решението го јакнеме македонскиот индентитет. Нема веќе ФИРОМ. Признати сме од Република Грција. Нашата добивка е бесценета, гаранција за безбедност и зајакнат идентитет. Република Северна Македонија е предвидено да биде за севкупна употреба”, рече Заев на прес-конференцијата.

Прво договорот ќе биде им презентиран на сите, а потоа потпишан од претставниците на двете влади.

„Следуваат писма од грчката влада до ЕУ и до НАТО дека нема спор за името и дека нема пречки за членство во НАТО и препорака за почеток на преговорите за членство. Веруваме дека во јуни ќе ги почнеме преговорите со ЕУ, а во јули ќе добиеме и покана за полноправно членство.
Наесен следува референдум, на кој граѓаните ќе одлучат за иднината. Граѓаните ќе бидат дел од иднината, да кажеме ‘да’ за македонската иднина.

По референдумот Грција до крајот на годинава ќе го ратификува договорот и протоколот за членството во НАТО“, рече премиерот.