!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Продажбата на земјоделски производи намалена за 14,2 отсто во однос на лани


Скопје, 16 мај, 2017 - 13:46 (META) 

Во првото тримесечје од 2017 година, откупот и продажбата на земјоделски производи се намалени за 14,2 проценти во однос на истиот период од претходната година, објави Државниот завод за статистика.

Кај откупот на земјоделски производи од индивидуалните производители е забележано намалување за 30 проценти, а кај продажбата на земјоделски производи од сопствено производство е забележано зголемување за 50, 6 проценти.

Зголемување на откупот и на продажбата на земјоделски производи е забележано кај житата, градинарските и фуражните растенија, овошјето, алкохолните пијалаци, добитокот и кај живината и јајцата.

Намалување е забележано кај индустриските растенија, млекото и млечните производи и кај рибата.

Месечната дистрибуција на вредноста на откупот и на продажбата на земјоделски производи покажува намалување во јануари и во февруари, додека во март е забележано зголемување.


Родот на 650 земјоделци од Пелагонија настрада од априлскиот студ


Битола, 15 мај, 2017 - 10:50 (META) 

Априлскиот студ и мраз годинава го уништи родот кај близу 650 земјоделци од Пелагонија. Според подрачниот раководител  на Министерството за земјоделство, водостопанство и шумарство во Битола, Илија Србиновски, денеска завршува увидот на стручните комисии за проценка на штети, по што извештаите ќе бидат пратени во министерството во Скопје за исплата на штетите.

– Три комисии, секоја со три члена, постапија по секоја пријава на оштетените земјоделци и заклучно е дека 648 индивидуални земјоделци, земјоделски фирми како и ЗК „Пелагонија“, „Лозар Битола“ претрпеле штети од 50 до 100 проценти од априлските мразеви и од студот. Најмногу се оштетени лозовите насади, јаболката, крушата, црешите – изјави Србиновски.

Според земјоделците, родот е преполовен не само од мразот, туку и од пролетната суша.

Во Битолско-пелагонискиот Регион под есенски култури се засеани 22.000 хектари, по што со преполовени приноси се соочуваат производителите на јачмен и на пченица.

– Ваква априлска суша, никогаш не сме имале на ова подрачје. На многу места комбајните нема што да работат, и пченицата и јачменот и другите култури се загрозени. Ни една машина не може да сработи на ваква суша – вели Вељо Тантаров, претседател на Сојузот на земјоделци на Македонија.

Земјоделците спасот од сушата го гледаат во копање бунари, како и во средствата за обесштетување од претрпени штети, кои не влегуваат во осигурителните полиси.


Се зголемува откупот и продажбата на земјоделски производи


Скопје, 16 февруари, 2017 - 14:05 (META) 

Откупот и продажбата на земјоделски производи во четвртото тримесечје од 2016 година се зголемени за 39,3 проценти во споредба со истиот период од претходната година, објави Државниот завод за статистика.

Кај откупот на земјоделски производи од индивидуалните производители има зголемување за 65,4 проценти, а кај продажбата на земјоделски производи од сопствено производство намалување за 2,9 проценти.

Зголемување на откупот и продажбата на земјоделски производи има кај индустриските, градинарските и фуражните растенија, овошјето, добитокот, живината и јајцата и млечните производи, а намалување кај житата, грозјето, алкохолните пијалаци, млекото и рибата.


Производителите бараат укинување на увозните давачки за смрзнато месо


Скопје, 30 јануари, 2017 - 16:14 (META) 

Укинување на увозните царински давачки за смрзнато месо бараат од Групацијата на производители и на преработувачи на месо при Стопанската комора на Македонија.

Од групацијата велат дека во просек, домашните производители плаќаат 20 отсто повисока цена за суровината од увоз во однос на регионот.

Тие тврдат дека на производителите на месо и на преработки од месо им се заканува престанок на производството ако Владата не ги намали овие давачки.

– Тоа ги прави неконкурентни месните преработки и месото во земјава и влијае на неконтролиран увоз на производи и на месо од регионот, на кои не се плаќаат никакви давачки. Според податоците на Државниот завод за статистика, до ноември минатата година неколкукратно е зголемен увозот на месо и на преработки – изјави Васко Ристовски.


Германија е четврта земја во Европа каде е регистриран птичји грип


Берлин, 24 ноември, 2016 - 10:31 (META) 

Птичји грип е потврден на една фарма во Долна Саксонија, каде што ќе бидат заклани 16.000 мисирки поради сомнеж дека се заразени, соопштија официјалните лица.

Вирусот е потврден во Клопенбург, Северна Германија и ова е прв случај во регионот кој е еден од најголемите производители на пердуви во Европа, соопшти министерството за земјоделство во Долна Саксонија.

Во последните неколку седмици, присуството на овој вирус е потврдено во уште неколку европски држави, но и во Израел.

Некои од тие држави издале наредби за држање на живината на затворено и подготвиле други санитарни мерки заради спречување за ширење на оваа болест.

Случаи на птичји грип забележани се на живинарските фарми во Германија, Унгарија, Австрија и во Данска.


Цветков: Во буџетот нема ставка за интервентен откуп на ориз


Штип, 14 јуни, 2016 - 18:40 (META) 

Интервентен откуп на ориз за државните стокови резерви тешко може да се изведе, рече денеска министерот за земјоделство, шумарство и водостопанство Михаил Цветков. Како што изјави министерот, проблемот e во тоа што во државниот буџет не била предвидена таква ставка.

Пред само една недела, заменик-министерот за земјоделство, шумарство и водостопанство, Ванчо Костадиновски, на производителите на ориз им најави дека Владата ќе дозволи интервентен откуп на ориз за стокови резерви.

Во Кочанско стојат неоткупени дури 70 отсто од ланската реколта. Министерот Цветков рече дека можно е на земјоделците да им се плати надомест за секој предаден килограм ориз на откупувачите и на таков начин да го решат проблемот.

Останува прашањето како Владата планира да ги стимулира откупувачите, кои речиси комплетно го стопираа откупот поради слабата побарувачка на пазарот.


Состанокот на земјите извозници на нафта заврши без договор за замрзнување на цената


Доха, 18 април, 2016 - 10:21 (META) 

Состанокот на земјите извозници на нафта во Доха, на кој требаше да се донесе одлука за замрзнување на производството на тој енергент, завшри без договор.

Учесниците на состанокот се договориле за замрзнување на производство на нафта да разговараат на состанок на ОПЕК во јуни.

Според зборовите на катарскиот министер за нафта и за енергетика, Мухамед бин Салех ел Сад, на учесниците на состанокот во Доха им било потребно дополнително време за да направат консултации.

Русија, Саудиска Арабија, Катар и Венецуела предложија да се замрзне обемот на производство на нафта за да се одржи нивото на светски цени на тој енергент.

На состанокот во Доха не учествуваше Иран, кој тежнее да се врати на светскиот нафтен пазар.


Русија и Саудиска Арабија го замрзнаа производството на нафта


Москва, 16 февруари, 2016 - 14:20 (META) 

Двата најголеми производители на нафта, Русија и Саудиска Арабија, се договорија да го задржат производството на нафта на ниво од јануари, пишува „Блумберг“.

Членките на Организацијата на земјите извознички на нафта (ОПЕК), како што се Венецуела и Нигерија, повикаа на одржување на итен состанок за да се разговара за цената на нафтата, која од 2014 година изгубила преку 70 проценти од вредноста, пренесува „Раша тудеј“.

На една третина од нафтените компании им се заканува висок ризик од банкрот за тековната година бидејќи ниските цени на суровините го загрозуваат пристапот до средства, како и способноста за намалување на долгот.

 


Поради санкциите од Русија, финските фармери изгубиле 400 милиони евра


Хелсинки, 16 септември, 2015 - 11:52 (META) 

Фармерите во Финска изгубија 400 милиони евра поради руската забрана за увоз на храна од Западот, која е воведена минатата година, соопшти финската унија на земјоделски производители.

Во соопштението се наведува дека најголеми загуби трпи млекарската индустрија.

ЕУ донесе одлука за дополнителни девет милиони евра за финските фармери, за да ги ублажи негативните последици од руската забрана за увоз на одредени производи од ЕУ.

Унијата на земјоделски производители изрази разочарување од оваа мерка, истакнувајќи дека „Европската комисија очигледно не сфаќа какви се последиците од руското ембарго за финското земјоделство“.

Поради вишокот млечни производи, компири и месо на финскиот пазар, цената на производите се намали од 5 до 12 проценти. Производителите бараат да се организира бесплатно складиште за вишокот стока.

Владата на Финска им вети помош на производителите на млеко и на млечни производи минатата година.

ЕУ ги продолжи санкциите кон Русија до 15 март 2016 година. Руските контрамерки вклучуваат забрана за увоз на говедско, свинско и на пилешко месо, млечни производи, риба, морски и јаткасти плодови, како и на овошје и на зеленчук.