Лидерот на СДСМ, Зоран Заев, на државниот министер во германското МНР, Михаел Рот, му го соопштил ставот на партијата дека се неопходни фер и регуларни избори, за што се потребни прочистен избирачки список и регулација на медиумите.
– Државната изборна комисија, како независна институција чијашто обврска е избирачкиот список, треба да ги соопшти роковите за прочистување на списокот, во кој мора да имаат доверба сите политички субјекти во државата и граѓаните. Од голема важност за предизборниот и за изборниот процес е да се обезбеди и објективно известување, бидејки најголем дел од медиумите се под контрола на власта, поради што опозицијата нема фер шанса за медиумско претставување. СДСМ нема да отстапи од ставот за фер и за регуларни избори со примена на европските вредности – рекол претседателот на СДСМ, Заев.
Тој на средбата со Рот истакнал дека Македонија на следните избори мора да добие влада со полн легитимитет, а тоа е можно само на фер избори. Според Заев, само така ќе се овозможи нормализација на институциите и стабилност на Република Македонија.
