Притвор од 30 дена за екс-градоначалникот на Демир Капија и соработниците


Скопје, 26 октомври, 2018 - 9:37 (META) 

Основното јавно обвинителство за гонење на организиран криминал и корупција (ОЈО ГОКК) соопшти дека по поднесената кривична пријава од Управата за финансиска полиција, почнало истражна постапка против поранешниот градоначалник на Демир Капија, Трајче Димитриев и три други лица, за кои вчера извести Финансиска полиција. По барање на ОЈО ГОКК, судија на претходна постапка од Основен суд Скопје 1 на тројца, меѓу кои и Димитриев, им определил притвор од 30 дена, а за четвртообвинетата, инаку братучетка на Димитриев, определил домашен притвор. Пријавени се и поранешниот претседател на Советот на општина Демир Капија, како и еден овластен проценител.

Сите се товарат за нанесена штета на Буџетот на Општина Демир Капија во износ од 15.456.106 денари (251.000 евра).

Според пријавата, во март 2012 година, Делегацијата на Европската Унија во Скопје и Трајче Димитриев, како градоначалник на општина Демир Капија, потпишале договор за грант за проект „Центар за едукација и вмрежување во туризмот Ценет“,  во вредност од 262.366 евра. За овој центар се реконструирала стара училишна зграда, која половина била сопственост на општината, а половина на четвртопријавената М.Ј., а за тоа биле употребени 101.230 евра од грантот, додека останатите потребни пари, 82.000 евра, биле од буџетот на општината. Другите пари биле наменети за опремување на центарот.

Потоа општинската половина од објектот со 800 квадратни метри површина, како и општинската половина од катастарската парцела, Димитриев на 12 јуни 2013 година ги продал на својата братучетка за 1,67 милиони денари (27.100 евра).

Тој износ е десет пати помал од реалната пазарна цена, велат од Финансиска полиција, дополнувајќи дека тој износ Димитриев прво од својата трансакциска сметка го префрлил на братучетката, односно и ги позајмил, а потоа и префрлил уште 4,49 милиони денари (73.000 евра) за да го доврши реконструирањето.

Реконструираниот објект бил наменет за сместување на фондацијата „Центар за едукација и вмрежување во туризмот – Ценет“, основана од страна на Општина Демир Капија, но Димитриев во април минатата година и таа Фондација без надомест ја отстапил на близок роднина.


Поранешниот градоначалник на Демир Капија повикан на разговор во Финансиска полиција


Скопје, 24 октомври, 2018 - 17:05 (META) 

Поранешниот градоначалник на општина Демир Капија, Трајче Димитриев, ќе биде кривично гонет заради продажба на општински објект на негов роднина, јави „Алсат – М“.

Според телевизијата, во периодот 2008-2009 година, објектот бил реновиран со 500.000 евра од ЕУ, а потоа бил продаден на роднина на градоначалникот Димитриев, за сума од 32.500 евра. Како што дознава „Алсат-М“, по продажбата, објектот бил пренаменет во казино.

Како што јави МИА, Димитриев и поранешниот претседател на Советот на општина Демир Капија, како и уште две други лица, денеска биле повикани на разговор во Управата за финансиска полиција.


Стевчо Јакимовски приведен, чека распит пред судија


Скопје, 8 август, 2018 - 9:31 (META) 

Поранешниот градоначалник на Општина Карпош, Стевчо Јакимовски, синоќа половина час пред полноќ, е приведен и се наоѓа во една од полициските станици во Скопје. До крајот на денот се очекува да биде изведен пред судија на претходна постапка.

Според Виктор Цветковски, адвокат на поранешниот градоначалник, ова е атак врз политичкиот ангажман на Стевчо Јакимовски.

Финансиската полиција вчера влезе во неколку станбени објекти на семејството Јакимовски, барајќи документи за одредени случаи. Засега од таму нема официјални информации.


Кривична пријава за Марјан Ристески за назначувањето директорка на Старскиот дом


Прилеп, 8 мај, 2018 - 15:22 (META) 

Основното јавно обвинителство Прилеп изготви обвинителен предлог против Марјан Ристески, претходниот градоначалник на Прилеп, товарејќи го за несовесно работење во службата. Станува збор за случајот за назначување на Ирена Стерјоска Локвенец, за директорка на Дом за стари лица „Киро Крстески Платник“, која, пак, на почетокот на годинава, заедно со Ристески, доби кривична пријава за злоупотреба на службената положба и областување. Но обвинителството сепак ја исклучило од обвинението.

Според обвинителниот предлог, Ристески несовесно постапувал во вршењето на своите овластувања и должности, со тоа што по објавената одлука од страна на Управниот одбор на ЈОУ Дом за стари лица „Киро Крстески Платник“ од Прилеп и распишаниот јавен конкурс за избор на директор на јавната установа, во кој како посебен услов било предвидено работно искуство од 4 години по дипломирањето, донел решение со кое за директор ја избрал кандидатката која во времето на изборот имала работно искуство од 2 години и 6 месеци.

Обвинителството истовремено решило да ја отфрли кривичната пријава против поранешната директорка Ирена Стерјоска Локвенец, поднесено од новото раководство на Домот „Киро Крстески Платник“, кое ја товареше дека направила злоупотреба на службената положба и областување директорувајќи по незаконска одлука на Ристески.

„Надлежен јавен обвинител утврди дека пријавеното дело не е кривично дело кое се гони по службена должност. Имено, во конкретниот случај не произлезе дека осомничената на некаков начин ја искористила својата службена положба или овластување, дека ги пречекорила границите на своето службено овластување, па со тоа за себе или за друг да предизвикала некаква корист или на друг да му предизвикала некаква штета, ниту пак ова кривично дело е сторено при вршење јавни набавки или пак на штета на Буџетот на РМ. Надлежниот јавен обвинител утврди дека незаконските дејствија со изборот на осомничената за директор иако таа не го исполнувала посебниот услов наведен во јавниот конкурс ги сторил оној кој го извршил изборот“, соопштија од Основно јавно обвинителство – Прилеп.


„Транспортер“: Одбраната на Талески побара иземање на судиите


Скопје, 13 април, 2018 - 12:19 (META) 

На новото рочиште за случајот „Транспортер“ во Основен суд Скопје 1 денеска, на кое се присутни сите 21 обвинети лица, адвокатот на главниот обвинет, поранешниот градоначалник на Битола, Владимир Талески, побара изземање на судечкиот совет.

Со тоа, уште еднаш се повтори практиката бранителите на поранешните високи функционери од различни нивоа да бараат изземање на судиите кои ги судат случаите по обвиненијата од Специјалното јавно обвинителство.

По барањето, судот даде пауза од еден час.

Во „Транспортер“  обвинети се поранешниот битолскиот градоначалник Владимир Талески и уште 20-тина лица за злоупотреба на службената положба во врска со организирањето превоз на ученици во Битола, со што, според обвинението, е направена проневера на околу 360.000 евра.


Нова, трета по ред, кривична пријава против поранешниот градоначалник на Ново Село


Струмица, 3 јануари, 2018 - 12:36 (META) 

Секторот за внатрешни работи Струмица до Основното јавно обвинителство поднесе нова кривична пријава против поранешниот градоначалник на општина Ново Село, Блажо Велков поради злоупотреба на службената положба и овластување.

Ова е трета кривична пријава што полицијата ја поднесува против Велков во изминaтите четири месеци.

Со последната, СВР Струмица го сомничи поранешниот градоначалник на општина Ново Село дека на 7 март 2014 година без да спроведе јавен оглас и јавно наддавање склучил анекс на Договорот за закуп на времен објект на Смоларскиот Водопад, сопственост на општината, со фирма од Струмица, со што го продолжил рокот на времетраење на договорот од

„Со потпишување на Анексот, Б.В. дозволил преуредување на постоечки објект во национален ресторан и изградба на неделиви објекти од тврда градба, спротивно на условите во претходно објавениот оглас за јавно надавање за издавање под закуп на времен објект и спротивно на потпишаниот договор за закуп на времен објект. На тој начин овозможил правното лице – Друштво за туризам, угостителство и услуги од Струмица, да биде во повластена положба на пазарот и со поголема имотна корист за подолг временски рок“, стои во соопштението на МВР.

Претходно, на 26 септември, СВР Струмица поднесе кривична пријава против Велков, додека тој сè уште беше градоначалник на Ново Село, под сомнеж дека одобрил службеници во општината да користат службени возила без патен налог за превезување пропаганден материјал за локалните избори, што се одржаа на 15 октомври.

На 13 ноември МВР соопшти дека е поднесена уште една кривична пријава против Велков бидејќи го користел службениот автомобил и по истекувањето на мандатот.


МВР му поднесе кривична и на поранешниот градоначалник на Свети Николе


Свети Николе, 13 ноември, 2017 - 15:49 (META) 

Надворешната канцеларија за криминалистички работи Свети Николе поднела кривична пријава пријава против поранешниот градоначалник на Свети Николе, Зоран Тасев, поради злоупотреба на службената положба и овластување.

Како што информира денеска МВР, осомничениот на 13 септември, оваа година на шефот на возниот парк му наредил на трошок на општина Свети Николе да наточи 48 литри еуродизел гориво во возило сопственост на неговиот татко и 10 литри за потребите на Територијалната противпожарна единица Свети Николе. Тасев, според полицијата наредил при плаќањето со картичката за бензин, регистрирана на Општина Свети Николе да прикаже дека 58,3 литри еуродизел гориво биле наточени во автобусот сопственост на Општината.


Нова кривична пријава за поранешниот градоначалник на општина Ново Село


Струмица, 13 ноември, 2017 - 13:59 (META) 

Секторот за внатрешни работи Струмица до Основното јавно обвинителство поднел кривична пријава против поранешниот градоначалник на општина Ново Село, Блажо Велков, бидејќи се „послужил“ со службениот автомобил и по истекувањето на мандатот.

Велков, како што соопшти денеска МВР, се товари за две кривични дела „послужување во службата„ и „посебни случаи на фалсификување исправа“.

Според МВР, Велков на 18 октомври, истиот ден кога му било врачено уверението на новиот градоначалник на општината, Боро Стојчев, одбил да изврши примопредавање на службеното возило и изготвил налог за патување во Скопје, заедно со неговата сопруга, кое според полицијата, било за приватни потреби.

Екипа на струмичката полиција го запрела возилото кај бензинската пумпа на „Лукоил“, пред влезот на Струмица, во кое совозач била сопругата на Велков, која, како што стои во соопштението на МВР, неовластено снимала со мобилниот телефон.

Полицајците, по наредба на ОЈО Струмица, го одзеле службеното возило, како и телефонот на сопругата на Велков.

Инаку, ова е втора кривична пријава против поранешниот градоначалник на општина Ново Село. Кон крајот на септември за време на кампањата за локалните избори, против него беше поднесена кривична пријава за злоупотреба на службената положба бидејќи на вработени од општината им одобрил да ги користат службените возила за разнесување на пропагадни материјали за изборите.


Кривична пријава за Арсенчо Алексовски, поранешниот градоначалник на Крива Паланка


Крива Паланка, 10 ноември, 2017 - 16:36 (META) 

СВР Куманово поднел кривична пријава за злоупотреба на службена положба и овластување против поранешниот градоначалник на општина Крива Паланка, Арсенчо Алексовски, како и против директор на средно училиште во Крива Паланка и вработени во ученички дом.

Според соопштенението, Алексовски како градоначалник на Крива Паланка од мај 2014 до јуни 2015 година  во четири наврати, на барање за согласност за вработување на две лица-воспитувачи во Општински ученички дом (ОУД) „Боро Менков“, доставено од В.Ј., која била в.д директор на домот, дал четири согласности за нивно вработување на определено време. Тоа е направено спротивно на Законот за ученички стандард и спротивно условите за нивно вработување, вели полицијата.

Второпријавената В.Ј., в.д.директор на ученичкиот дом, доби кривична пријава оти  дополнително по објавен конкурс за прием на ученици во јавни ученички домови за учебната 2014/2015 година, овозможила прием на 38 редовни ученици и потоа списокот го доставила до Министерството за образование и наука (МОН), иако знаела дека 27 ученици воопшто не ги исполнувале условите за престој во домот. Притоа, иако некои од нив не престојувале во домот, директорката за сите барала пари од МОН, во периодот од септември 2014 година заклучно со март 2015 година. Со тоа, нанела штета на министерството во износ од 1.417.500 денари.

Тројца вработени во ученичкиот дом, пак, од СВР Куманово добиле кривични пријави оти „го покривале“ таквото постапување на директорката.

Пријава добил и М.М., тогашен директор на Средното општинско училиште  „Ѓорче Петров“ од Крива Паланка. Полицијата го товари дека од септември до крајот на декември во учебната 2014/2015 година без документација и изјави од родители или старатели, внел 24 ученици на списокот за бесплатен превоз. Потоа МОН исплаќало пари на училиштето, иако тие 24 ученици биле сместени во ученичкиот дом.


Поднесен обвинителен акт против поранешниот градоначалник на Охрид


Охрид, 16 ноември, 2015 - 14:44 (META) 

Охридското јавно обвинителство ја завршило истрагата и до Основниот суд во градот поднело обвинителен акт против поранашениот градоначалник на Охрид, А.П., кој се товари за кривичното дело злоупотреба на службената положба и овластување, соопшти денеска Јавното обвинителство.

Како што информира обвинителството, тој се товари дека во март 2013 година, како градоначалник на Општина Охрид, во постапка за доделување договор за краткотраен закуп на паркиралишта со јавно наддавање, овозможил постапката да се спроведе, а избраниот понудувач да не изврши уплата од 2.010.000 денари или околу 32.000 евра за закуп на паркиралиштата за период од една година.

„Обвинетиот првично не постапил по известување на Државната изборна комисија (ДИК), која побарала да се запре постапката за јавната набавка до завршување на изборите за градоначалник и за членови на Советот на Општината, а потоа и со потпишување на договорот за закуп на паркинг-простор, му овозможил на закупувачот корист – да почне да стопанисува со паркиралиштата, предмет на објавата и на постапката, без да изврши уплата на договорениот едногодишен надомест“, стои во соопштението од обвинителството.

Поранешниот градоначалник на Охрид, А.П., на 21 ноември минатата година беше приведен во обемна полициска акција, под оперативното име „Јагула“. Покрај него, во акцијата беа приведени уште десетина лица, од кои најголемиот дел беа поранешни вработени во локалната самоуправа, за време на неговиот градоначалнички мандат, а против нив МВР поднесе пријави за повеќе кривични дела.