Komisioneri europian për Zgjerimin, Johannes Hahn, iu ka bërë thirrje partive politike në Maqedoni që të vazhdojnë dialogun politik në kuadër të tryezës negociuese që njëherësh sipas tij paraqet rrugën e vetme që vendi të vazhdojë procesin e integrimit europian. Gjatë një fjalimi në institutin “Brookings ” në Washington, të publikuar në ueb faqen zyrtare të Bashkimit Evropian, Hahn ka porositur se “nëse partitë nuk punojnë bashkë dhe nuk mbeten të përqendruara për të mbajtur zgjedhje korrekte, qeveria e re nuk do të pranohet dhe njihet ndërkombëtarisht”.
Hahn shprehu zhgënjimin e thellë për ngjarjet e fundit. “Ne kemi investuar shumë në marrëveshjen e qershorit/korrikut të vitit të kaluar në mënyrë që vendi të shkojë përpara në rrugën e tij euro-atlantike. Shumë nga afatet nuk janë respektuar kur është dashur, por përfundimisht kjo është bërë. Nga këtu, fakti se zgjedhjet e 5 qershorit gjenden në një situatë të vështirë, të jem i sinqertë nuk e dijë se si do të duket çështja pas zgjedhjeve. Ajo që mund të bëj është ti ftoj të gjitha partitë, shoqërinë civile, por sidomos partitë politike, të kthehen në tryezën e negociatave dhe të përkushtohen në perspektivën euro-atlantike të vendit”, tha Hahn.
Ai ka pohuar se do të tentojë të ulë liderët politik në tryezën e bisedimeve.
