Повеќе од 200 артилериски гранати истрелала Северна Кореја во правец кон морската граница со Јужна Кореја кај островот Јеонпјеонг, соопшти јужнокорејската војска, пренесува Би-би-си.
Јужна Кореја им нареди на цивилите да побараат засолниште на островот, а официјален Сеул го осуди потегот, нарекувајќи го „провокативен чин“.
Во 2010 година, севернокорејската војска направи сличен инцидент на островот Јеонпјеонг, при што загинаа четири лица.
Артилериските гранати биле истрелани во петокот, помеѓу 09 и 11 часот по локално време (00 до 02 часот по Гринич), не влегле на територијата на Јужна Кореја, бидејќи сите паднале во тампон зоната меѓу двете земји.
Началникот на здружениот генералштаб на Јужна Кореја рече дека инцидентот не предизвикал „никаква штета на нашиот народ или војска“, но додаде дека чинот „го загрозува мирот на Корејскиот полуостров и ги зголемува тензиите“.
Гранатирањето уследи по предупредувањата од Пјонгјанг дека го гради својот воен арсенал како подготовка за војна која може „да избие во секое време“ на полуостровот.
Властите на двата блиски острови, Баенгњеонг и Даечеонг, исто така ги информираа цивилите да побараат засолниште.
Последниот инцидент доаѓа неколку месеци откако Северна Кореја целосно го суспендираше воениот договор со Југот, кој имаше за цел да ги подобри односите меѓу двете земји.
Договорот почна да се влошува откако Пјонгјанг тврдеше дека успешно лансирал шпионски сателит во вселената во ноември. Ова доведе до тоа Јужна Кореја делумно да го суспендира договорот, велејќи дека ќе ги обнови летовите за надзор долж границата.
Потоа, Пјонгјанг рече дека ќе ги повлече сите мерки „преземени за да се спречи воен конфликт во сите сфери, вклучително и копно, море и воздух“, и ќе распореди „помоќни вооружени сили и воен хардвер од нов тип“ во пограничниот регион.
Но, Северна Кореја го прекрши договорот повеќе пати во претходните две години, лансирајќи проектили во морето во правец на Јужна Кореја. Последен пат Северна Кореја истрела артилериски гранати во морето во декември 2022 година, при што само таа година се случија девет такви инциденти.
Затоа, некои аналитичари тврдат дека официјалното повлекување на Пјонгјанг од договорот можеби нема да направи голема разлика.
„Бидејќи Северна Кореја на прво место не се придржуваше до договорот, можноста за ограничен судир секогаш постоеше“, рече Џо Би Јун од Корејскиот институт за одбранбени анализи.
Островот Јеонпјеонг е дом на воена база и мало цивилно население од околу 2.000 луѓе.Тој се наоѓа на 3 километри од спорната поморска граница во Жолтото Море и 12 километри од севернокорејскиот брег. Локацијата беше сцена на меѓукорејски поморски судири низ годините. Во 2010 година двајца војници и двајца цивили беа убиени откако Северна Кореја истрела десетици артилериски гранати кон островот.
