Павле Беловски, новинар во Телма телевизија и досегашен член на Извршниот одбор на Самостојниот синдикат на новинарите (ССНМ) е избран за в.д. претседател на ССНМ, на Собранието кое се одржа во саботата. На Собранието, кое за првпат се одржа онлајн, Беловски едногласно беше избран за претседател, на местото на Ѕвездан Георгиевски, кој ја водеше оваа новинарска организацијата во изминатите две ипол години.
Како што соопштија од ССНМ, на Собранието беше донесена и одлука за проширување на Извршниот одбор (ИО) од досегашните 9 членови, на 13, пред сѐ со синдикални претставници од медиуми кои имаат формирано синдикални групи. Покрај Маја Јовановска, Павле Беловски, Тамара Грнчароска, Роберт Атанасовски и Теофил Блажевски, кои учествуваа во работата на ИО во изминатиот период, дел од Извршниот одбор на ССНМ и во наредниот ќе бидат Сунаи Сабриоски, Зоран Маџоски, Марина Илиевска, Тамара Чаусидис, Теодора Цветковска, Жарко Јорданоски, Перо Момировски и Игор Стефановски.
На Собранието беа разгледани и активностите на ССНМ во изминатата година, од кои беа издвоени, потпишувањето на Колективниот договор со МИА, низа јавни дебати и работилници, издавање на публикацијата „Новинарството како јавно добро“ и други тековни активности поврзани со работничките права на новинарите и медиумските работници, информираат од ССНМ.
