Германија е единствената членка на Европската Унија каде што има повеќе потстанари отколку луѓе кои поседуваат свои куќи или станови. Минатата година уделот на Германците кои поседуваат свои домови паднал од 49 на 47 проценти, пренесува германската новинска агенција ДПА.
Во Австрија, која е втора по Германија на листата на земји од ЕУ со најмал број станари кои се и сопственици на куќи или станови, бројката паднала од 54 на 51 отсто, објавила вчера статистичката агенција Еуростат.
Вкупно, во земјите на ЕУ, бројот на сопственици на имот се намалил за нешто помалку од еден процентен поен.
Вкупно, 69 отсто од станарите во ЕУ се сопственици на имот, а 31 отсто се потстанари.
Уделот на сопствениците е особено висок во источните земји-членки како Романија (95 отсто), Словачка (93 отсто), Хрватска (91 отсто) и Унгарија (90 отсто).
Уделот на сопственост е најмал во Германија и Австрија, во Данска (60 проценти) и Франција (63 проценти). Надвор од ЕУ, Швајцарија има уште помал удел во сопственост од Германија, 42 отсто.
