Фото: Engin Akyurt from Pixabay

Европската федерација на новинари (ЕФН) и нејзината членка, Здружението на новинарите на Македонија (ЗНМ) го оспоруваат толкувањето на македонскиот суд и го повикуваат уште еднаш да ја разгледа својата одлука откако тужбата пред Граѓанскиот суд во Скопје на новинарот Горан Трпеноски вчера беше одбиена, бидејќи судот не му го призна статусот на новинар. 

Горан Трпеноски е еден од 21 новинари кои на 27 април 2017 година за време на протестот и упадот од демонстрантите во зградата на Парламентот, беа под закана или им беше забрането да известувааат на местото на настанот.

„Горан Трпеноски известуваше за настаните на 27 април 2017 година за онлајн  медиумот САКАМДАКАЖАМ.МК (sdk.mk). Откако кон него беа упатени закани се одлучи да поднесе тужба за попречување на правото за пристап до информации и нанесената психолошка штета. Вчера, во својата пресуда, судијката Јованка Спировска Панева објасни дека во тоа време Трпеноски не бил новинар затоа што работел за онлајн медиумот (sdk.mk), што според Законот за медиуми не се смета за медиум. Понатаму во оваа пресуда, судот не го признава правото на информација како уставно право“, се наведува во соопштението на ЗНМ.

ЕФН и ЗНМ сметаат дека со оваа пресуда се кршат европските правни стандарди за слобода на печатот, дефинирани од Европскиот суд за човекови права. Оваа пресуда ја прекрши и судската пракса на Апелациониот суд во Македонија со која се потврди дека не треба да им се ускрати позицијата на новинар на професионалците кои работат во интернет медиумите. ЕФН се приклучува на нејзината членка ЗНМ во барањето да се преиспита оваа пресуда со која се нарушува слободата на печатот.

Европската Федерација на Новинари (ЕФН) е најголемата организација на новинари во Европа, која застапува повеќе од 320.000 новинари во 72 новинарски организации во 45 држави.