Четири лица под истрага во Прилеп за кривично дело насилство


Прилеп, 5 ноември, 2018 - 11:36 (META) 

Основното јавно обвинителство Прилеп донесе Наредба за спроведување истражна постапка против четири лица, поради постоење основано сомнeние дека сториле кривично дело насилство.

Лицата се осомничени дека на 3 ноември во Прилеп, во присуство на голем број граѓани, ја загрозиле сигурноста и нанеле тешки телесни повреди на двајца оштетени. По претходна вербална расправија помеѓу оштетените и еден од осомничените, тој телефонски ги повикал останатите осомничени и со патничко моторно возило марка „Лада” започнале да ги бараат оштетените низ градот.

„Откако ги пронашле, се симнале од возилото и се упатиле кон оштетените. Сите четворица започнале да ги удираат оштетените лица по главата и телото. Притоа на едниот оштетен му нанеле животно загрозувачки повреди како последица на кои тој е неконтактибилен и се одржува во живот со помош на апарати, додека на второто нападнато лице му нанеле телесни повреди изразени со набиеници по главата и телото. Со ваквите дејства осомничените во јавноста предизвикале чувство на несигурност, загрозување и страв“, се вели во соопштението на Основно јавно обвинителство.

Со оглед на тоа што надлежниот обвинител процени дека за тројца од осомничените постојат околности кои укажуваат на опасност од бегство, како и основан страв дека ќе ја попречуваат кривичната постапка и ќе влијаат врз сведоците, до судијата на претходна постапка при Основниот суд Прилеп беше доставен и предлог за определување мерка притвор за овие лица.


Ангеловски: Напаѓачите на починатото момче се во притвор и ќе одговараат


Скопје, 9 јули, 2018 - 14:28 (META) 

Насилникот е насилник, без разлика на неговата етничка припадност, во државата постојат закони, функционира правната државата и одговорните за нападот врз Н.С. (21), кој изутрината почина во комплекс клиниките „Мајка Тереза“ ќе одговараат пред законот, изјави денеска портпаролот на МВР, Тони Ангеловски.

Нагласи дека МВР експресно го расчистило случајот и сторителите се приведени и одредена им е мерка притвор. Тој додаде дека целокупниот материјал и сите докази се доставени до надлежното јавно обвинителство, ОЈО-Скопје.

Ангеловски посочи дека МВР не е надлежно да одговара дали постои можност случајот да се преквалификува од „насилство“ во „убиство“ и оти за тоа е надлежно обвинителството.

На 29 јуни на автобуска постојка на булеварот „Александар Македонски“ три лица на возраст од 19, 20 и 21 година го нападнале Н.С., по што тој е пренесен во Ургентниот центар во Скопје.

На 2 јули, Секторот за внатрешни работи Скопје поднесе кривична пријава против Б.Б.(20), С.Д.(21) и Ј.Љ.(19), сите од Скопје за сторено кривично дело „насилство“. По преземени мерки, од страна на полициски службеници, прво и второпријавениот се лишени од слобода.

Ангеловски појасни дека по третопријавениот се трага.


ВМРО-ДПМНЕ: Судот е директен учесник во продлабочувањето на кризата поттикната од власта


Скопје, 28 јануари, 2018 - 11:26 (META) 

Дурловски, Илиевски, Јовановски, Дамовски, Чавков, пратениците и сите останати кои се неправедно притворени за настаните од 27 април, се терористи колку што се терористи македонските иселеници кои вчера протестираа низ Европа и светот, повторно реагираат од опозициската ВМРО-ДПМНЕ за продолжувањето на притворите на осомничените за минатогодишните насилства во Собранието.

Од партијата велат дека Македонија е узурпирана држава каде е укинато владеењето на правото и каде невини луѓе, без никаква правна основа, политички се држат во притвор, додека „владините претставници лицитираат со македонската историја и иднина“.

„Органите на прогонот се користат за монтирање на судски случаи и пресметка со сопствените граѓани кои мислат поинаку од власта. Судот е најдиректен и најодговорен учесник во продлабочување на кризата која е поттикната од катастрофалните политики од страна на владата на СДСМ. Судот има обврска да ја гарантира законитоста и да биде чувар на демократијата. Токму затоа треба итно и неодложно да ги пушти од притвор Чавков, Дамовски, Илиевски, Јовановски и останатите чија единствена вина е љубовта кон државата“, стои во соопштението.


Судот по втор пат им го продолжи притворот на осомничените за 27 април


Скопје, 26 јануари, 2018 - 15:52 (META) 

Кривичниот совет на Основниот суд Скопје 1 го прифати барањето на Обвинителство и им ги продолжи притворите на 28 осомничени за насилствата во Собранието од 27 април, минатата година, соопштија попладнево од судот.

Со одлуката на судот, по втор пат им е продолжена мерката притвор на поранешниот министер за внатрешни работи Митко Чавков, Богдан Илиевски – Бетмен, актерот Владо Јовановски, режисерот Борис Дамовски, пратениците Крсто Мукоски, Љубен Арнаудов, Сашо Василевски, како и куќните притвори на Јохан Тарчуловски и Љупчо Димовски.

Судот го прифати предлогот на Обвинителството за гонење на организиран криминал и корупција и им го укина притворот на поранешниот директор на Македонската опера и балет Игор Дурловски и на Елена Доцевска – Божиновски, службеничка во Собранието, и го замени со куќен притвор.

Кривичниот совет, исто така, на предлог на Обвинителство го укина куќниот притвор на пратеничката Жаклина Пешевска и и одреди мерки за претпазливост – забрана за напуштање на живеалиштето (градот Скопје), одземање на пасошот и забрана за приближување и воспоставување, односно одржување контакт со одредени лица.


Апелација денеска ќе одржи јавни седници за жалбите на притворените за 27 април


Скопје, 10 јануари, 2018 - 11:10 (META) 

Апелацискиот суд за денеска ги закажа јавните сендици на кои ќе се разгледуваат жалбите на дел од притворените за насилствата во Собранието од 27, април, минатата година.

Првата седница, како што информираат од Апелација, е закажана во 14 часот, откако второстепениот суд вчера ги добил одговорите на жалбите од Вишото јавно обвинителство.

Јавни седници за разгледување на жалбите побараа актерот Владо Јовановски, поранешниот шеф на обезбедувањето на Трајко Вељаноски, Горан Ѓошевски, Оливер Поповски од шестата управа и Мунир Пепиќ од Агенцијата за разузнавање.

Според информации од Апелацискиот суд поднесени се вкупно 16 жалби за продолжувањето на притворот на осомнилчените за 27 април.

Кривичниот суд во Скопје на предлог на Јавното обвинителство за гонење на организиран криминал и корупција на 27 декември 2017 година им го продолжи притворот за нови триесет дена на пратениците Крсто Мукоски, Сашо Василевски и Љубен Арнаудов, на поранешниот министер за внатрешни работи и директорот на Бирото за јавна безбедност Митко Чавков, организаторите на протестите на „За заедничка Македонија“ Игор Дурловски, Борис Дамовски, Богдан Илиевски и на уште шестнаесет лица осомничени за насилствата во Собранието.

Куќниот притвор им е продолжен на пратениците Љупчо Димовски, Јохан Тарчуловски, Жаклина Пешевска и на уште еден осомничен, додека за С.М. и М.М. судот го прифати предлогот на обвинителството за укинување на притворот и определување куќен притвор.


Владо Јовановски и уште тројца од 27 април бараат јавни седници за жалбите за притворите


Скопје, 4 јануари, 2018 - 13:55 (META) 

Актерот Владо Јовановски, поранешниот шеф на обезбедувањето на Трајко Вељаноски, Горан Ѓошевски, Оливер Поповски од шестата управа и Мунир Пепиќ од Агенцијата за разузнавање побарале Апелацискиот суд на јавна седница да ги разгледува нивните жалби за продолжувањето на притворот.

Од Апелација потврдија дека кај нив стигнале осумте жалби и дека се испратени на одговор во Вишото јавно обвинителство и откако ќе бидат комплетирани судот ќе ги закаже јавните седници.

Инаку, рокот за жалба за најголем дел од осомничените на кои им беше продолжен притворот сè уште трае бидејќи нивните адвокати уште ги немаат добиено решенијата на Кривичниот суд.

Кривичниот суд во Скопје на предлог на Јавното обвинителство за гонење на организиран криминал и корупција пред точно една недела, односно на 27 декември 2017 година им го продолжи притворот за нови триесет дена на пратениците Крсто Мукоски, Сашо Василевски и Љубен Арнаудов, на поранешниот министер за внатрешни работи и директорот на Бирото за јавна безбедност Митко Чавков, организаторите на протестите на „За заедничка Македонија“ Игор Дурловски, Борис Дамовски, Богдан Илиевски и на уште шестнаесет лица осомничени за насилствата во Собранието.

Куќниот притвор им е продолжен на пратениците Љупчо Димовски, Јохан Тарчуловски, Жаклина Пешевска и на уште еден осомничен, додека за С.М. и М.М. судот го прифати предлогот на обвинителството за укинување на мерката притвор и определување мерка куќен притвор.


Распишана потерница преку Интерпол за петмина осомничени за 27 април


Скопје, 4 јануари, 2018 - 13:32 (META) 

Министерството за внатрешни работи преку канцеларијата на Интерпол во земјава, распиша меѓународна потерница за петмина осомничени за насилствата во Собранието од 27 април, минатата година, кои се во бегство.

Станува збор за Никола Митревски – Кољо, Александар Василевски – Нинџа, Младен Додевски, Дејан Давидовски и Митре Питроповски, кои досега се бараа само со домашна потерница.

Сите петмина, Основното јавно обвинителство за гонење на организиран криминал и корупција ги товари за кривичното дело терористичко загрозување на уставниот поредок и безбедноста на државата.

Кривичниот суд во Скопје кон средината на минатиот месец на петмината во отсуство им одреди мерка притвор од 30 дена, со што веднаш штом ќе станат достапни за органите на прогонот ќе бидат спроведени во истражен затвор.

Тие се дел од 36-те осомничени за кои ОЈО за гонење на организиран криминал и корупција на 28 ноември, минатата година отвори истрага за насилствата во Собранието.


Досега жалби за само осум притворени за 27 април, адвокатите на другите уште не ги примиле решенијата


Скопје, 3 јануари, 2018 - 13:42 (META) 

Адвокатите на поголемиот дел од осомничените за насилствата во Собранието од 27 април, минатата година сè уште не ги примиле решенијата на Кривичниот суд во Скопје за продолжување притворот поради што досега не доставиле жалби на одлуките.

Инаку, жалбите се поднесуваат преку Кривичниот суд, од каде, по нивното комплетирање се доставуваат во Апелација.

Од Кривичен за „Мета“ велат дека досега кај нив пристигнале осум жалби, кои се комплетирани и во текот на денешниот ден треба да бидат доставени до Апелацискиот суд на разгледување и одлучување.

Претходно од второстепениот суд нѝ изјавија дека досега до нив не стигнала ниту една жалба за продолжениот притвор на осомничените за насилствата во Собранието.

– За дел од адвокатите нема уредна достава дека ги примиле решенијата, а за дел, за кои има уредна достава жалбените предмети се комплетирани и ќе бидат доставени до Апелацискиот суд најверојатно во текот на денешниот ден – ни изјавија од Основниот суд Скопје 1.

Адвокатите кои не поднеле жалба сè уште имаат право да го сторат тоа, бидејќи рокот од 48 часа за поднесување почнува со приемот на решенијата на првостепениот суд.

Кривичниот суд во Скопје на предлог на Јавното обвинителство за гонење на организиран криминал и корупција пред точно една недела, односно на 27 декември 2017 година им го продолжи притворот за нови триесет дена на пратениците Крсто Мукоски, Сашо Василевски и Љубен Арнаудов, на поранешниот министер за внатрешни работи и директорот на Бирото за јавна безбедност Митко Чавков, организаторите на протестите на „За заедничка Македонија“ Игор Дурловски, Борис Дамовски, Богдан Илиевски и на уште шестнаесет лица осомничени за насилствата во Собранието.

Куќниот притвор им е продолжен на пратениците Љупчо Димовски, Јохан Тарчуловски, Жаклина Пешевска и на уште еден осомничен, додека за С.М. и М.М. судот го прифати предлогот на обвинителството за укинување на мерката притвор и определување мерка куќен притвор.


Судот им одреди притвор на четворицата осомничени за 27 април кои се во бегство


Скопје, 25 декември, 2017 - 13:44 (META) 

Судија на претходна постапка при Основниот суд Скопје 1 им одредил мерка притвор на четворица осомничени за насилствата во Собранието од 27 април, оваа година, кои се во бегство и против нив треба да биде распишана потерница, соопшти судот.

„Судија на претходна постапка при Основниот суд Скопје 1 – Скопје, по добиено известување од надлежните органи дека лицата А.В., Н.М., М.Д. и Д.Д. опфатени со предлогот на ОЈО за гонење организиран криминал и корупција за определување мерка притвор, а во врска со настаните од 27 април во Собранието на Р.М., се недостапни на органите за прогон, донесе решенија со кои на сите им определи мерка притвор во траење од 30 дена по нивно пронаоѓање односно лишување од слобода, а поради постоење на причините предвидени во член 165 став 1 точки 1, 2 и 3 од Законот за кривична постапка“, стои во соопштението на Кривичниот суд.

Решенијата за притвор се испратени до Обвинителството, кое треба да донесе наредба за распишување на потерница по осомничените лица.

Обвинителството за гонење на организиран криминал и корупција кон крајот на ноември отвори истрага против вкупно 36 лица за насилствата од 27 април, од кои најголемиот дел се наоѓаат во притвор.

Меѓу притворените се и поранешниот министер за внатрешни работи и директорот на Бирото за јавна безбедност, Митко Чавков, водачите на протестите на „За заедничка Македонија“, Богдан Илиевски, Игор Дурловски и Борис Дамовски, како и шестмина пратеници од редовите на ВМРО-ДПМНЕ во Собранието.

Сите 36 осомничени се товарат за кривичното дело „терористичко загрозување на уставниот поредок и безбедноста на државата“, за кое е предвидена казна затвор од најмалку 10 години.


Уапсени шест лица во БиХ поради воени злосторства


Сараево, 19 декември, 2017 - 10:16 (META) 

Полициски службеници на државната агенција за истраги и заштита (СИПА), постапувајќи по наредба на обвинителството на Босна и Херцеговина, утрово на подрачјето на општините Какањ и Илијаш уапсиле шест лица осомничени за воени злосторства, јавува балканскиот сервис на „Радио Слободна Европа“.

Шесте лица, како што се наведува во соопштението на СИПА, се уапсени поради основано сомнение дека ги извршиле кривичните дела воени злосторства против цивилното население, воени злосторства против воени заробеници, организирање на групи луѓе и поттикнување на извршување на воени злостроства, противправно убивање и ранување на непријатели и повреда на законите или обичаите на војување на подрачјето на местото Чемерно, општина Илијаш, во текот на 1992 година.

Лицата се приведени во службените простории на СИПА за криминалистичка истрага, по што ќе бидат предадени на Обвинителството на БиХ за натамошна постапка.