23 милиони долари грант од САД за Македонија


Скопје, 7 септември, 2018 - 9:38 (META) 

Македонија доби 23 милиони долари грант од САД  за развојна цел. Договорот е потпишан меѓу државата претставена од Министерството за финансии и Соединетите Американски Држави претставена од Агенцијата на САД за меѓународен развој, УСАИД.

За оваа цел, Македонија ја посети високиот претставник на УСАИД, Гречен Биркл, a на потпишувањето присуствуваа амбасадорот на САД во Македонија, Џес Бејли и директорот на канцеларијата на УСАИД во Македонија, Давид Етбери.

– Договорот е особено важен. Средствата се наменети за активности кои ќе овозможат зголемен раст на приватниот сектор, поголема вклученост на граѓаните во носењето на одлуките, зајакнато добро владеење и подобрена кохезија во општеството – рече Тевдовски и додаде дека со овој договор се зајакнува соработката со САД кои го поддржуваат напредокот на Македонија на нејзиниот пат напред.

Биркл изрази верување дека иницијативите ќе помогнат Македонија да го забрза патот кон само-одржливост и евентуалното пристапување кон НАТО и Европската Унија.

– Нашите проекти ќе имаат за цел да ја зајакнат конкурентноста на микро, малите и средните претпријатија, да го подобрат пристапот до финансии, да создадат поедноставено деловно опкружување и да обезбедат поголема енергетска сигурност. За да го промовираме учеството на граѓаните, нашите програми ќе го поддржат јакнењето на граѓанското општество и зголемувањето на професионалноста на независните медиуми. За да го зајакнеме доброто владеење, ќе обезбедиме помош за градење на капацитетите на извршната власт, законодавните тела и националните изборни тела. И на крајот, за да ги зајакнеме врските меѓу заедниците, ќе ги поддржиме активностите што ја подобруваат меѓуетничката интеграција и го зголемуваат вклучувањето на маргинализираните групи во општеството – истакна Биркл.

УСАИД од 1993 година до денес во Македонија имаат инвестирано 640 милиони долари во програми кои создадоа нови работни места, поддржаа слободни и фер избори, ги подобрија меѓуетничките односи и придонесоа за вклучување на маргинализирани и ранливи групи.


Грант од 4,6 милиони евра за инвестиции во комунална инфраструктура во Гостивар


Скопје, 11 јули, 2018 - 14:15 (META) 

Денеска во Министерството за финансии беше потпишан договор со кој се дава грант од 4,6 милиони евра неповратни средства од Швајцарскиот државен секретаријат за економски прашања (СЕКО) за подобрување на водоводната и канализационата инфраструктура во Гостивар.

Договорот го потпишаа министерот за финансии, Драган Тевдовски, министерот за транспорт и врски, Горан Сугарески директорот на ЈП „Комуналец“ – Гостивар, Исак Лазами и претставник од „КфВ“ банката, која е администратор на грант средствата, Рене Ескеман.

„Вкупната сума која ќе се инвестира во подобрување на комуналната инфраструктура во Гостивар е 7,2 милиони евра. Овие средства ќе бидат наменети за набавка на опрема за откривање протекување вода и со тоа намалување на загубите на вода, предвидени се средства за нови резервоари, за нови цевководи и подобрување на мрежата. Покрај грантот од Швајцарија, Гостивар за реализација на овој проект ќе добие и 250 илјади евра грант од „КфВ“ банка, како и заем од Владата во износ од 1,7 милиони евра. Исто така, општината ќе учествува со сопствени средства во проектот со износ од 682 илјади евра“, информираат од Министерство за финансии.

Од таму додаваат дека набргу грант-средства за комунални проекти од „КфВ“ банката ќе се доделат и за општините Радовиш и Кавадарци.


ЕУ го одобри инвестицискиот грант од 70 милиони евра за инфраструктурни проекти


Скопје, 13 декември, 2017 - 17:25 (META) 

Претставници на Секретаријатот за европски прашања и Министерство за финансии учествуваа на управувачкиот комитет на Инструментот за инвестициска рамка за Западен Балкан (WBIF), на кој беа распределени, 100 милиони евра како инвестициски грантови кои се неповратна помош од Европската Унија за земјите од Западен Балкан.

„Од распределените 100 милиони евра, Македонија денеска и формално доби одобрение на 68,6 милиони евра инвестициски грант за проектот за рехабилитација на источниот дел од железничката пруга од Коридор 8, и тоа за втората делница, Бељаковце – Крива Паланка во должина од 34 километри“, се вели во соопштението на Секретаријатот за европски прашања.

Од таму додаваат дека, Комитетот го одобрил и проектот за изработка на техничка документација за автопатот Стенковец – Блаце, во висина од 1.010.000 евра.

„Овие средства треба да се искористат за изработка на документација за инфраструктурен и основен проект за автопатско решение за државен пат А4, како прва фаза за изградбата на автопатот кој ќе го поврзе Скопје со косовската граница“, се додава во соопштението.

На состанокот биле најавени два нови повици за аплицирање на инвестициски грантови во висина од околу 100 милиони евра и техничка помош во висина од 12 милиони евра. Повикот за инвестициски грантови за инфраструктурни проекти ќе биде отворен во текот на 2018.


МЕПСО ќе ги подобрува своите капацитети со околу 50 милиони евра


Скопје, 29 септември, 2017 - 15:43 (META) 

Договор вреден 4,6 милиони евра меѓу МЕПСО и конзорциумот „Сименс и Сискон“, за ревитализација на трансформаторската станица „Дуброво“, беше потпишан денеска во Владата на Република Македонија, соопшти владината служба за информирање. Со тоа, се нагласува во соопштението, почнува среднорочен инвестициски циклус на МЕПСО во своите капацитети.

Сашо Василевски, генералниот директор на МЕПСО, истакна дека почнува среднорочен инвестициски циклус со проекти за ревитализација на повеќе трансформаторски станици и изградба на седум нови далекуводи во земјава вредни повеќе од 50 милиони евра.

Вредноста на договорот е 4,6 милиони евра, а се финансира од сопствени средства на МЕПСО. Ревитализацијата на ТС „Дуброво“ ќе трае три години.


Сугарески најави изградба на водоводни и канализациски мрежи во 20 општини


Скопје, 25 септември, 2017 - 12:44 (META) 

Инвестиции од 20 милиони евра за нови водоводни и канализациски мрежи во 20 општини најави денеска министерот за транспорт и врски, Горан Сугарески. Рече дека акцентот ќе се стави на руралните општини, а целта е од сегашните 18 отсто, покриеноста со такви мрежи да се искачи на 40 отсто.

– Со оваа нова инвестиција на Министерството за транспорт и врски, онака како што ветивме, почнуваме со реализација на проектот за унапредување на водоводната и на канализациската мрежа. Особен акцент ставаме на руралните општини каде процентот на покриеност со водоводна и со канализациска мрежа е 18 отсто. Наша цел е за 4 години овој процент да се зголеми на 40 отсто, што е во функција на обезбедување рамномерен регионален развој и баланс меѓу урбаните центри и руралните средини – рече Сугарески.

Тој напомена дека проектите од овој нов инвестициски циклус на Министерството за транспорт и врски ќе се реализираат во соработка со Европската инвестициска банка, КФВ банката и со Секретаријатот за економски прашања од Швајцарија.

Првите проекти што ќе почнат наскоро, се 18  на број, а за нив се планирани вкупно 7,4 милиони евра. Ќе се гради цевковод за подобрување на водоснабдувањето во Гостивар, ќе се инсталираат нови водомери со далечинско отчитување во општина Куманово, а во прилепско Големо Коњари ќе се гради дел од канализациска мрежа. Планирана е и изградба на секундарна мрежа на фекална канализација за населените места Короишта, Ливада и Ложани во општина Струга, во вредност од 456.000 евра. Исто така, ќе се реконструира водоводна мрежа на населба Превалец до село Оризари во оштина Велес, во Липково ќе се гради пречистителна станица за вода за пиење, а во Крива Паланка ќе се реконструира дел од водоводната мрежа. Во Долнени предвидено е да се гради дел од фекална канализација со пречистителна станица за село Ропотово, а предвидени се и проекти во Неготино, Битола, Виница, Ресен, Студеничани, Старо Нагоричане и во Желино.

Со 8 милиони евра, од кои 5 милиони се грант, односно неповратни средства, ќе се подобрува водоснабдувањето во општините Кавадарци, Радовиш и Гевгелија, а со неповратни 4 милиони евра од Секретаријатот за економски прашања од Швајцарија ќе се подобрува водоснабдувањето во општина Гостивар.


Сугарески: ЕУ додели грант од 35,4 милиони евра за изградба на патот Градско – Дреново


Скопје, 23 август, 2017 - 14:55 (META) 

Министерството за транспорт и врски во име на Владата потпиша нов билатерален договор со Европската Унија за ко-финансирање на проектот за „Изградба на експресниот пат на делницата Дреново – Градско, како дел од крак 10-Д на патниот Коридор 10“, информираше денеска министерот за транспорт и врски, Горан Сугарески.

Тој додаде дека овој нов договор со ЕУ е од исклучително значење за модернизирање на патната инфраструктура во Пелагонискиот регион.

– Европската Унија, подржувајќи ги напорите на новата Влада, донесе одлука да се вклучи во финансирањето на експресниот пат од Градско до Дреново со грант, а не заем, во износ од 35,4 милиони евра. Со договорот се предвидува градежните работи на оваа делница долга 15 километри да започнат до крајот на 2017 година и да се завршат во рок од две години. Делницата Градско – Дреново ќе се гради на ниво на експресен пат кој ќе ги задоволи сите сообраќајни и безбедносни стандарди – изјави Сугарески.

Тој додаде дека изградбата на патот Градско – Дреново е прва фаза. Втората фаза која предвидува изградба на делницата од Фаришка до Дреновска клисура е во тек, но се соочуваат со проблеми на кои секојдневно работат за да се надминат.

– За третата фаза од Тројаци до Плетвар, вклучително и влезот во Прилеп, сме во напредни преговори повторно со Европската Унија за да обезбедиме дополнителни средства. Очекуваме некаде крајот на 2019, почетокот на 2020 година да имаме комплетно нов експресен пат од Градско до Прилеп – додаде Сугарески.

Министерот за транспорт и врски информираше дека во рамките на Секторската оперативна програма за транспорт 2014-2020, од страна на Европската Унија, одвоени се вкупно 108,9 милиони евра за проекти за подобрување на патната и железничката инфраструктура долж мрежата на европски транспортни коридори кои поминуваат низ територијата на Македонија.

Од овие 108,9 милиони евра планирано е, 60 милиони евра да бидат искористени и за изградба на пругата кон Бугарија конкретно делницата Крива Паланка – Деве Баир. Дел од овие средства ќе се искористат и за изградба на последната фаза од експресниот пат до Прилеп.


Анѓушев: Добивме 70 милиони евра грант од ЕУ за пругата кон Бугарија


Скопје, 13 јули, 2017 - 14:15 (META) 

Од вкупно 194 милиони евра грант наменет за развој на инфраструктурата во Западен Балкан, Македонија на самитот во Трст добила 70 милиони евра за доизградба на пругата од Бељаковце до Крива Паланка, информираше денеска вицепремирот задолжен за економски прашања, Кочо Анѓушев, кој додаде дека оваа неповратна помош, доволна за да се покрие 46 отсто од вкупната сума што е потребна за изградба на втората делница од пругата кон Бугарија.

– Препознаен е реформскиот дух на Владата практично да ги имплементира сите процедури и потребни чекори за побрзо и полесно пристапување кон Европската Унија и до нејзините фондови – изјави Анѓушев.

Одговарајќи на новинарско прашање, Анѓушев кажа дека пругата ќе биде градена во континуитет и дека третата делница ќе се гради откако ќе биде завршена втората.

Тој, исто така, нагласи и дека биле направени контакти со Светска банка, која била незадоволна што последните две-три години воопшто не биле склучени нови договори за изградба на инфраструктура во Македонија, а и тие чија реализација почнала не е на потребното ниво.

Средствата што ги нуди Светска банка најчесто се за автопатска мрежа, а било разговарано и за буџетска поддршка која, како што рече Анѓушев, конечно ќе заврши кај македонските компании.


„ЕУ за тебе“ утре во Желино и во Брвеница


Желино, 5 јули, 2017 - 10:52 (META) 

Шефот на Делегацијата на Европската Унија во Македонија, Самуел Жбогар, утре ќе биде во општините Желино и Брвеница, во рамки на кампањата „ЕУ за тебе“.

Тој ќе се сретне со градоначалниците на Желино, Фатмир Измир, и на Брвеница, Енвер Пајазити, и ќе направи увид во некои проекти во овие општини што се финансирани од Проектот на ЕУ за инвестиции во рурални општини.

Со 260.000 евра што ЕУ ги подарува во рамките на овој проект, треба да се обезбеди пивка вода за селата Палатица, Требош, Узурмиште, Желино, Добарце, Чифлик, Ларце, Копачин Дол, Рогле, Ново Село, Групчин, Долна Лешница и Церово, сите во општина Желино, а 40.000 евра од планираните пари ќе ги обезбеди Општината.

Во Брвеница, со 260.000 евра што ЕУ ги подарува, треба да се реконструираат локалните патишта меѓу селата Милетино и Челопек, како и да се изгради ново училиште за 168 ученици во селото Гургурница. Другите 420.000 евра Општина Брвеница ќе ги обезбеди со заеми од Проектот на ЕУ за инвестиции во рурални општини.


Со европски пари, Општина Охрид ќе реализира два проекти


Охрид, 20 април, 2017 - 10:58 (META) 

Општина Охрид доби два гранта од Програмата за прекугранична соработка помеѓу Република Македонија и Република Грција, во вкупна вредност од 780.000 евра.

Првиот грант во висина од 180.000 евра европски пари го доби за проектот „Меѓугранична соработка и интегрирани здравствени и социјални услуги за стари лица и за деца и нивна превенција“. Грантот е од програмата ИПА2 на ЕУ за спроведување активности во чиј фокус се старите лица, децата и социјално ранливите категории.

Целта на овој грант е преку истражување во руралните области, програма за социјална и здравствена превенција, мобилни социјални и здравствени услуги, да се зголеми бројот на луѓето што ќе ги користат социјалните и здравствени услуги со фокус на старите лица, децата и на социјално ранливите категории.

Вториот, од 600.000 евра, ќе се реализира преку ЈП „Охридски комуналец“, за проектот „Одржливо управување и третман на био-отпад со користење методи за производство на био-гориво“.

Обезбедувањето на законски и на финансиски услови за одржливо управување со отпадот и за негов третман ќе доведе до успешен економски развој на јавното претпријатие и до намалување на дивите депонии во Охридскиот Регион.

Ваквите активности значат и заштеда на енергија, бидејќи конвертирањето на био-отпадот во био-гориво ќе генерира одреден процент од вкупното количество енергија што се користи.


Европски грант за дигитализација на културното наследство во Охрид


Охрид, 16 март, 2017 - 15:47 (META) 

Охрид е еден од четирите града на Балканот под патронат на УНЕСКО, кој доби нов европски грант од првиот повик на програмата на Европската Унија, „Интеррег Балкан – Медитеран“ 2014-2020 (Interreg Balkan- Mediterranean), во висина од 169.000 евра за европскиот партнерски проект „Е-систем за управување со интер-регионалното културно наследство“ (Inter Regional Cultural Heritage Management e-System – IRC- HERMES).

Со овој проект ќе се изврши дигитализација на културното наследство. Покрај документирањето и дигитализацијата, овој проект ќе опфати и заштита и промоција на културното наследство.

Покрај Охрид, средства добија и Крф и Самос од Грција, како и Ѓирокастро од Албанија.

За проектот аплицираше и ќе го реализира секторот за туризам и локален економски развој, при Општина Охрид.