Уставниот суд на денешната седница одлучи да не поведе постапка за оценување на уставноста на Одлуката за утврдување на постоење на вонредна состојба, се наведува во соопштението на Уставниот суд. Станува збор за втората по ред вонредна состојба што ја прогласи претседателот Стево Пендаровски во април, а која што сè уште трае.

Уставните судии со мнозинство гласови одлучија дека одлуката за вонредна состојба на претседателот Стево Пендаровски не може да биде ставена под знак прашање.

Одлуката на судиите да не поведат постапка за второто по ред прогласување вонредна состојба следува откако Уставниот суд претходно не ја доведе во прашање ниту првата вонредна состојба што беше прогласена од претседателот Пендаровски во март.

Шефот на државата два пати прогласи вонредна состојба од по 30 дена поради сериозноста на ситуацијата со епидемијата на новиот корона вирус во земјава.

Уставот му дава можност на Претседателот на РСМ да прогласи вонредна состојба кога ќе настанат големи природни непогоди или епидемии.