Свирепа судбина за животот на едно куче сподели денеска ЈП „Лајка“, со апел да се согледа реалноста како завршуваат дел од кучињата кои имаат сопственици, а потоа се откажуваат од нив и ги напуштаат.
Германскиот овчар бил пријавено од граѓани дека веќе подолго време е на јавен простор и напуштено. На 18-ти месецов, тоа било заловено од заловувачките екипи во општина Аеродром.
„По стандарна проверка се воспостави дека кучето има микрочип, а неговиот сопственик веднаш беше контактиран. Наредниот ден на 19.10.2023 кучето беше превземено од неговиот сопственик, кој си плати за заловување на кучето, согласно правилникот за работа на ЈП Лајка“, соопштуваат од претпријатието.
Минатата недела повторно имало пријава од граѓани дека има напуштено и заробено куче во напуштена фабрика во населба Автокоманда.
„Нашите екипи веднаш постапија по пријавата. Кога пристигнаа на посочената локација, го најдоа истиот германски овчар, напуштен и врзан во напуштената фабрика. Кучето беше изгладнето, изнемоштено и болно, свесно оставено без пристап до вода и храна, видно вознемирено, но среќно кога виде дека доаѓаат луѓе да му помогнат. Кучето веднаш доби вода и храна, а и самото влезе во нашето комбе“, споделуваат од ЈП „Лајка“.
Кучето ќе остане во стационарот до негово вдомување, а случајот ќе биде пријавен до Агенција за храна и ветеринарство. Од Лајка најавуваат и дека ќе биде покренета кривична постапка согласно член 233 од Кривичен законик за мачење на животни, против сопственикот на кучето.
Германскиот овчар, како што велат од Лајка, не е во најдобра здравствена состојба, но се надеваат дека за брзо време ќе биде добро и ќе биде огласен, за да му се најде нов дом.
