Имаше три безбедносни проблеми на Балканот, а сега, по решението на спорот за името на Македонија, останати се само два: Нормализацијата на односите меѓу Косово и Србија и средување на дисфункционалното владеење во Босна и Херцеговина, сметаа Даниел Сервер од Школата за напредни меѓународни студии на американскиот универзитет „Џонс Хопкинс“.

Тој беше еден од говорниците на вчерашната дебата „Западен Балкан: Справување со идните предизвици“ во Вашингтон организирана од универзитетот, политичкото советодавно тело „Балканот во Европа“ и Европскиот фонд за Балканот, извести „Јуропиан Вестерн Балканс“.

– Ова е вистинскиот момент да се реши прашањето за Косово и Србија. И кога тоа ќе биде решено, проблемот во БиХ ќе изгледа многу поинаку од таа перспектива и полесен за решавање. Помислете што ако не беше решен проблемот со името на Македонија, колку потешко би било решевањето на спорот помеѓу Косово и Србија – рече Сервер.

Директорот на Центарот за југоисточни европски студии од Универзитетот во Грац и координатор на „Балканот во Европа“, Флоријан Бибер, смета дека главниот проблем на Балканот се авторитарните влади кои не се целосно посветени на либералните демократски вредности на ЕУ и САД. За Договорот од Преспа тој рече дека успеал оти бил постигнат од локалните фактори.

– Тој беше постигнат со волјата на двете влади. Исто така, не би дошло до договор меѓу двете влади ако не беше НАТО и ЕУ перспективата за Северна Македонија – рече Бибер.