Европскиот парламент усвои резолуција за Газа во која изразува длабока загриженост за катастрофалната ситуација во Палестинa, вклучително и непосредниот ризик од глад, и го повикa Израел веднаш да дозволи целосен и непречен пристап до хуманитарна помош до територијатa, пренесуваат светските агенции.
Во резолуцијата, 372 пратеници глазаа „за“, 44 „против“, а 120 беа воздржани. Пратениците го повикуваат Израел „веднаш да дозволи и олесни целосна испорака на помош за Газа преку сите постоечки премини и да ја нагласи итната потреба за брза, безбедна и непречена пристап до хуманитарна помош“, беше објавено денеска на веб-страницата на Европскиот парламент .
Резолуцијата го повторува повикот за итен и траен прекин на огнот за да се реши непосредниот ризик од масовно гладување во Газа и за итно и безусловно ослободување на сите заложници, како и итен пристап до Меѓународниот комитет на Црвениот крст до сите израелски заложници кои се држат во Газа за медицинска помош.
Европскиот парламент го поздрави формирањето на поморски коридори за испорака на помош во Газа, но нагласи дека приоритет треба да се даде на распределбата на помошта на копно.
Укажувајќи на ширењето на болести и потврдената смрт на деца поради неухранетост и дехидрација, европратениците ги повикуваат израелските власти да ги отворат премините Рафа, Керем Шалом, Карми и Ерез, а исто така да ја препознаат суштинската улога на Палестинската агенција на ОН за бегалци во регионот.
Блокадата на хуманитарната помош и нападите врз хуманитарните конвои, вклучително и киднапирањето и ограбувањето на хуманитарни конвои од страна на Хамас, се остро осудени.
Резолуцијата силно ги осудува повторените напади врз цивили кои бараат помош, врз хуманитарни и медицински установи и работници. Во неа се изразува огорченост од катастрофалното влијание врз цивилите во Газа, особено врз децата и ги повикува сите страни веднаш да ги прекинат овие напади и повикува на независна меѓународна истрага за нив.
Исто така, се осудува порастот на екстремистичкото насилство меѓу доселениците и нападите на израелските вооружени сили врз Палестинците на Западниот Брег, каде загинаа стотици и беа повредени илјадници палестински цивили.
Во Резолуцијата се опоменува и забрзувањето на воспоставувањето нелегални населби на палестинската територија, што е кршење на меѓународното право и се изразува длабока загриженост за ескалацијата на конфликтот, особено во Либан.
Воедно, се предупредува дека не може да има мир, безбедност, стабилност и просперитет во Газа или за палестинско-израелско помирување сè додека Хамас или која било друга терористичка група има каква било улога во Газа.
