Експлодираше иранскиот нафтен танкер кој се запали во Кина


Шангај, 10 јануари, 2018 - 13:10 (META) 

Кинеското министерство за сообраќај соопшти дека експлодирал иранскиот нафтен танкер кој претходно се судри со кинески товарен брод.

Според наводите на кинеските власти, спасувачките бродови кои беа во потрага по преживеани морале да се повлечат на безбедносна далечина.

Танкерот „Санчи“ со 136.000 тони лесна нафта се запали во саботата вечерта откако се судри со кинески товарен брод, на околу 300 километри од Шангај.

Од 32 членови на екипажот, 30 Иранци и двајца од Бангладеш, пронајдено е само едно тело, соопшти министерството.

Иранската компанија чиј танкер се запали соопшти дека се уште постои надеж да се најдат преживеани помеѓу оние кои се водат како исчезнати.


Пожар на ирански танкер во близина на Кина


Пекинг, 8 јануари, 2018 - 13:55 (META) 

Кинеската државна телевизија објави дека постои ризик нафтен танкер што се запалил по судир со товарен брод во близина на источниот брег на Кина да експлодира и да потоне.

Се наведува дека спасувачките тимови од три држави се обидуваат да пронајдат 32 исчезнати членови на екипажот и да запрат излевање нафта од запалениот брод што превезувал 136.000 тони нафта односно кондензат, што е вид на ултра лесна нафта, поопасна за околината отколку сирова нафта.

Медиумот повикувајќи се на кинески официјални лица јави дека никој од 30 Иранци и двајца државјани на Бангладеш кои исчезнаа во саботата до утрово не се пронајдени.

Нафтениот танкер Санчи регистриран во Панама пловел од Иран кон Јужна Кореја кога во Источното Кинеско Море на 257 километри од Шангај се судрил со брод што превезувал жито. Кина, Јужна Кореја и САД испратија бродови и авиони во потрага за екипажот на Санчи. Екипажот на другиот брод кој бил кинески е спасен.


Грчките крајбрежни служби сè уште се справуваат со излеаната нафта кај Атина


Атина, 12 септември, 2017 - 14:35 (META) 

Тимови за вонредна состојба во Грција се борат за да го спречат излевањето нафта во водите во близина на Атина од танкер кој викендов потона кај островот Саламис.

Крајбрежната стража наведе дека е загрозен цел залив на југоистокот на островот откако потонал танкерот „Агиа зони 2“, кој превезувал 2.500 метрички тони гориво.

Нафтената дамка се протега на повеќе од еден и пол километар, а за нејзино целосно чистење веројатно ќе бидат потребни четири месеци, соопшти член на атинскиот совет за рибарство, Вула Тутунци, за градското радио во Атина.
Сè уште не се знае што го предизвикало потонувањето на танкерот во неделата. Временските услови во таа област тогаш биле погодни.

Капетанот на танкерот и главниот инженер се обвинети за небрижност и се пуштени на слобода до почетокот на судењето.

Крајбрежната стража наведе дека се поставени рампи за да се спречи разлевањето на нафтата, а за нејзино собирање се користат камиони цистерни. И покрај тоа, голем дел од горивото кое се излеало завршило на плажата Саламина.
Во моментов се прават обиди да се затвори дупката на танкерот.

Локалните власти ги повикаа рибарите да го избегнуваат ова подрачје.


Киднапиран малезиски нафтен танкер


Куала Лумпур, 17 август, 2016 - 12:06 (META) 

Малезиски нафтен танкер со 900.000 литри дизел е киднапиран и пренесен во индонезиските води, соопштија денеска малезиските власти.

Танкерот „Вијер Хармони“, пловел од пристаништето „Тањунг Пелепас“ во Малезија кога бил киднапиран.

Малезиската агенција за поморска безбедност соопшти дека бродот веројатно сега се наоѓа кај индонезискиот остров Батам.

Се уште не е познат идентитетот на киднаперите, а се проценува дека вредноста на товарот на бродот изнесува околу 400.000 долари.

 


Пожар на руски танкер, едно лице загинато


Москва, 23 април, 2016 - 12:01 (META) 

Во пожарот кој избил на руски танкер во Касписко Море, во туркменистанските води, загина едно лице, објави спасувачкиот центар во Авганистан.

„Во 9 часот ја примивме информацијата дека во јужните води на Касписко Море се запалил рускиот танкер „Паплфлот“. Од танкерот се евакуирани десет луѓе, а загинало едно лице кое работело како механичар“, наведуваат од центарот.

Во моментов три азербејџански бродови и два хеликоптери го гаснат пожарот на танкерот.


Либиски авион бомбардира грчки танкер


Дарна, 5 јануари, 2015 - 16:43 (META) 

Грчките власти соопштија дека непознат воен авион го бомбардирал грчкиот танкер во Либија и оти двајца членови на екипажот загинале, а двајца се повредени. Либија соопшти дека нивни авиони го бомбардирале танкерот бидејќи немал дозвола за влез во пристаништето и оти изгледал „сомнително“.

Грчкото министерство за поморска трговија соопшти дека бродот „Арево“, кој плови под либериско знаме, вчера бил закотвен во пристаништето Дерна, на истокот на Либија, кога се случил нападот.

Портпаролот на либиското министерство за одбрана, Ахме ел Масмари, изјави дека авионите на военото воздухопловство двапати ги гаѓале танкерите пред да добијат информација од Владата дека тој е ангажиран со локалната електрана.
Градот Дерна, каде се наоѓаше танкерот за време на нападите, е база на исламските екстремисти, кои се лојални на Исламска држава.