Ќе се унапредува соработката со Косово, во борбата против корупцијата и тероризмот


Скопје, 7 ноември, 2018 - 17:03 (META) 

Националните координатори за гранично управување на Македонија и на Косово, Владимир Пивоваров и Иса Џемајлај, денеска во Владата потпишаа Меморандум за соработка меѓу Координативните центри за гранично управување на двете земји.

На овој начин ќе се обзбеди побрз проток на патници и стоки и зголемена соработка во борбата против корупцијата и против тероризмот.

– Со брзата размена на информациите, се надеваме дека во иднина ќе ги надминеме досегашните проблеми, пред сè во побрзиот проток на патници и стоки, со што на граѓаните, а особено на бизнис заедницата од Македонија и од Косово ќе им се овозможи поголем промет, односно поголем профит – изјави Пивоваров.

Џемајлај рече дека потпишувањето на овој Меморандум е резултат на исклучително добрата билатерална соработка помеѓу двете земји.

– Со Меморандумот ќе ја унапредиме соработката меѓу Македонија и Косово особено во областа на борбата со меѓународниот криминал, што ќе биде од помош за граѓаните на двете земји- подвлече Џемајлај.


Границата е отворена, но само за бегалци чија дестинација е позната


Скопје, 21 јануари, 2016 - 14:17 (META) 

Делот на македонско-грчката граница кај кота 59 е повторно отворена за влез на бегалците кои преку западно-балканаската рута транзитираат кон земјите од Европската унија (ЕУ), потврди за „Мета“ Министерството за внатрешни работи (МВР).

– Од вчера попладне, јужната граница е повторно отворена за влез на бегалци и состојбата е редовна. Се пропуштаа оние странски државјани на кои во документите издадени во Грција е наведена крајната дестинација, односно земјата кон која патуваат во Европската унија – ни изјави Дејана Недељковиќ од секторот за односи со јавноста на МВР.

За отворената граница попладнево јавија и грчките медиуми. Весникот „Та неа“ пишува дека иако границата повторно е отворена, контролата е дополнително засилена и македонските граничари пропуштаат само бегалци што ќе одат во Австрија или Германија.

Според грчките информации, бегалците што немаат официјална белешка во која стои дека планираат да бараат азил во Германија или Австрија, нема да може да влезат во Македонија и оттаму да патуваат за ЕУ.

Од МВР не можеа да ни ја потврдат информацијата дека се дозволува влез само на бегалците што патуваат за Австрија и Германија. Оттаму остануваат на изјавата дека во документите „мора да биде наведена крајната дестинација, односно земјата од ЕУ каде патуваат“.

Грчките граничари, како што пишува „Та неа“, сметаат дека оваа одлука е донесена под влијание на другите северноевропски земји. Како што пишува весникот, тие барале на документите што им се издаваат на мигрантите да се наведе конечната дестинација, односно државата во која планираат да заминат и да бараат азил.

Поранешниот евроамбасадор во земјава, Ерван Фуере, во својата денешна колумна за порталот „Балкан инсајт“ посветена на последните политички случувања во земјава, како една од причините за драматичниот пресврт во односот на Европската комисија кон актуелната владејачка структура и поддршката за изборите на 24 април, ги наведува индикациите за договор помеѓу ЕК и Владата во врска со мигрантската криза.

„Постојат индикации дека е има договор меѓу Европската комисија и Владата, во кој е вклучена обврската за зголемени напори во справувањето со протекот на мигранти, како и потези за решавање на спорот за името со Грција во замена за поддршката на ЕУ за изборите во април“, пишува Фуере во својата колумна.

Во неутралната зона Идомени сè уште има околу 1.000 бегалци кои чекаат да ја напуштат Грција и да се упатат кон ЕУ.

Во кампот и понатаму се пропуштаат само бегалци од Сирија, Ирак и од Авганистан.

Во вторникот оваа недела, на барање на Словенија за редуцирање на бројот на бегалци поради дефект на тамошната железница, македонските власти ја затворија границата со Грција и го запреа протекот на мигранти.

Иако ова беше официјалното објаснување, во Грција се создаде вознемиреност дека целиот случај може да е однапред договорено сценарио за затворање на границите, по најавите на германските и на австриските власти дека се размислува да се намали бројот на бегалци што ќе бидат примени во Европска унија.

 


Попоски: Очекуваме грчката полиција да овозможи протeк на границата


Скопје, 23 ноември, 2015 - 14:25 (META) 

Министерот за надворешени работи, Никола Попоски, денеска по состанокот со амбасадорите на земјите-членки на ЕУ рече дека мигрантите кои неколку дена чекаат за влез во земјава нема да бидат пропуштени и дека се очекува грчката полиција да ги расчисти за да овозможи протек за оние што бегаат од воените жаришта. Попоски рече дека ќе се преземат сите мерки за заштита на границата поради напливот на мигранти, а за тоа која мерка кога ќе се преземе и во колкав обем, ќе проценат безбедносните служби.

– За нас постојат три приоритети во случајот со мигрантската криза. Првиот е обезбедување на хуман третман на бегалците, вториот – обезбедување и контрола на границата и насочување на мигрантите кон граничните премини каде може да се обезбеди нивна регистрација, и третиот – поделба на бегалците на тие што бегаат од кризата и на тие што сакаат да заминат во земјите на ЕУ заради економски интерес – рече Попоски.

Тој додаде и дека помошта што треба да ја добие земјава за справување со мигрантската криза нема да биде критериум за дејствување и дека верува дека тие контингенти на помош ќе дојдат до ресорните министерства кои ангажираат ресурси за справување со мигрантите.