!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

В сабота на 31-от Охридски пливачки маратон 22 пливачи ќе се борат за титулите


Охрид, 14 август, 2017 - 14:58 (META) 

На Охридското Езеро в сабота ќе се одржи 31-то издание на Охридски пливачки маратон, на кој за титулите во машка и во женска конкуренција ќе се борат 15 пливачи и седум пливачки.

Патеката „Климе Савин“ на охридскиот маратон, долга 30 километри, започнува од манастирот „Свети Наум“ и завршува на градското пристаниште во Охрид. Маратонот во сегашниот формат се одржува од 1962 година, а првата маратонска трка се одржала во 1954 година во должина од 2,5 километри.

Поради долгата традиција овој маратон од 1998 година стана дел и од Гран при серијата на Меѓународната пливачка федерација (ФИНА) која заедно со пливачката федерација на Република Македонија со години го организира овој прекрасен спортски настан.

Неприкосновен шампион во машка конкуренција со години беше легендарниот Петар Стојчев од Бугарија со  дури 11 победи. Минатата година златото го освои македонскиот пливач Томи Стефановски.

Женските трки во овој маратон се одржуваат уште од самите зачетоци кога Атина Бојаџи беше првата жена да победи на трката во 1962 година. Мината година златото го зеде Олга Кузудуб од Русија.

Главен покровител на охридскиот пливачки маратон е претседателот на Република Македонија, а организатори се Меѓународната пливачка федерација (ФИНА) и Пливачката федерација на Република Македонија. Годинава како координатор се вклучува и Општина Охрид.


Илинденски пливачки маратон во Охрид


Охрид, 2 август, 2016 - 11:44 (META) 

Во организација на пливачкиот клуб „Охридски бранови 2008“ од Охрид, денеска, по повод 2 Aвгуст- македонскиот национален празник, традиционално, по 37. пат, ќе се одржи Илинденскиот пливачки маратон – „Охрид 2016“.

Овој спортски настан меѓу граѓаните е познат и како „Мал маратон“ бидејќи на него пливаат и помлади.

Се плива на патеката Горица – Охрид, во должина од 2,5 километри, додека своите пливачки способности и вештини ќе ги одмерат повеќе од 50 пливачи од повеќе пливачки клубови од Македонија и од странство, организирани во две возрасни групи – до 16 години и постари.

Трките ќе почнат во 10 часот и во 10.15 часот од плажата пред некогашниот хотел „Парк“.