!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Шестмина полицајци повредени по натпреварот Брегалница – Пелистер


Кочани, 24 октомври, 2016 - 14:57 (META) 

Шестмина полицајци се повредени откако се обиделе да спречат физичка пресметка помеѓу навивачите на фудбалските клубови „Брегалница“ и „Пелистер“.

Битолските „чкембари“ сакале да се пресметаат со штипската „фаланга“ по фудбалскиот натпревар кој нивните тимови го играа вчера во Кочани и заврши нерешено.

„Автобус со навивачи на „Пелистер“, кој бил на заминување, застанал по поминати стотина метри и од него излегле 20-30 навивачи на „Пелистер“, кои се упатиле кон паркиран автобус на ФК „Брегалница“ и кон граѓани кои биле присутни на натпреварот. Од страна на полициски службеници било интервенирано и спречени биле другите навивачи да излезат од автобусот, но биле физички нападнати од поголем број навивачи“, информираат од МВР.

Шестмина полицајци завршиле на лекарски преглед, а петмина битолчани на возраст од 18 до 40 години биле приведени во полициска станица.


Пропадна тендерот за продажба на ФК „Брегалница“


Штип, 3 октомври, 2016 - 16:31 (META) 

Една понуда пристигнала на јавниот повик за продажба на фудбалскиот клуб „Брегалница“ од Штип. На денот кога требаше да бидат отворени понудите, Општината Штип одлучи да го поништи тендерот и уште веднаш распиша нов. Според објаснувањето од Општината, тендерот требало да биде меѓународен, со објава во странски медиум. Имено, идејата била да привлечат странски инвеститори.

Отворањето на понудите имаше голем интерес од јавноста по инцидентот во кој дојде до физичка пресметка меѓу член на управата на клубот и тренерот Јуксел Јесилова, зад кој стои заинтересиран инвеститор од Туција. Во саботата по натпреварот меѓу „Брегалница“ и „Работнички“, Јесилова добил ултиматум со закана дека има 48 часа да го напушти Штип. Јесилова веднаш заминал во странство. Во кратка телефонска порка, тој ни потврди дека е на одмор, надвор од земјата. На прашањето за тоа дали имал закани, кратко одговори: „Да, точно е“.

Во меѓувреме, добивме потврда дека единствената понуда е од турските инвеститори, како и тоа дека Јесилова се враќа утре во Штип, а со него ќе дојдат и заинтересираните турски инвеститори.

Како е направен превид во објавата на тендерот, има различни толкувања. Според некои шпекулации, Општината купува време бидејќи се појавил уште еден заинтересиран инвеститор од Романија. Деновиве се слушнаа и бројни шпекулации дека досегашната управа на „Брегалница“ нема така лесно да се откаже од клубот, иако дел од членовите јавно демантираа.


Фудбалскиот клуб „Брегалница“ ќе се продава на берза


Штип, 31 август, 2016 - 13:06 (META) 

Општината Штип, преку основен пакет на акции во износ од 25.000 евра, на берза ќе го продава акционерското друштво „Брегалница 2008“. Оваа одлука ја официјализираше мнозинството на седницата на Советот на Општината Штип.

Ова е обид прволигашот „Брегалница“ да стане вториот градски фудбалски клуб, по примерот на „Вардар“, кој ќе се продава на Македонската берза за хартии од вредност.

Општината Штип секоја година троши меѓу 300.000 и 500.000 евра за клубот, кој не носи приходи. Како што во една пригода изјави градоначалникот Илчо Захариев, сите пари што Општината ги собира од граѓаните на име данок на имот, одат во касата на клубот „Брегалница“.

– Основен критериум за избор на најдобар понудувач е висината за пакетот акции, кој не смее да биде понизок од 300.000 евра годишно за инвестирање, исплата на плати и на премии и за други трошоци. Закупувачот се обврзува да работи со клубот најмалку 10 години – ја образложи одлуката претседателот на Комисијата за спорт, Борче Коцев.

Комисија, формирана од градоначалникот со членови од власта и од опозицијата, ќе работи на изборот на најдобриот понудувач. Веќе подолго време во Штип се зборува дека турски инвеститор е заинтересиран за „Брегалница“.

Општината, која заедно со УЕФА го реновира стадионот, останува сопственик на спортскиот терен. Таа е должна и да го одржува, без оглед кој и да биде новиот инвеститор.

– Секој што ја купува „Брегалница“, ја презема со сите нејзини долгови. Точно е дека „Брегалница“ има долг од четири милиони денари. Општината ќе има само една обврска, а таа е да ги одржува терените, бидејќи тие се наши – изјави од советничката говорница градоначалникот Илчо Захариев.

Фудбалскиот клуб „Брегалница“ пред десетина години направи обид да се натпреварува со странски инвеститор. По повеќе од една година работење со клубот, бугарскиот бизнисмен Јордан Андреев си замина, со образложение дека станува збор за инвестиција без заработка.


Брегалница го отсече кочанско Прибачево


Штип, 4 мај, 2016 - 15:34 (META) 

Реката Брегалница се излеа на триста метри до првите селски куќи во кочанското село Прибачево. Во опасност се доведени не само нивите, туку и селските куќи. Поради ерозија на земјиштето, Брегалница го сменила својот тек. Однесени се околу десет хектари оризoви посеви. Земјоделците ги повикаа институциите да интервенираат со градежна механизација и да ги заштитат куќите и имотите.

– Немаме пат. Патот до селото е однесен. Луѓето нема каде да поминуваат. Нивите се однесени. Бараме Владата и кризниот штаб да ја санираат реката, да се смени текот на водата, бидејќи Брегалница постепено носи сè – вели земјоделецот Раде Стојчевски, чии ниви се поплавени.

Жителите на Прибачево велат дека Брегалница е сè поголема и се плашат дека ќе им ги поплави домовите. Проблемот дополнително се усложнува откако прелеала браната Калиманци, што го потврди и директорот на Водостопанство „Брегалница“, Николче Гацов.

Колкава е штетата по оризовите посеви, допрва ќе се утврдува. Засега прв приоритет е заштитата на куќите во пониските кочански села по текот на Брегалница.


Браната Калиманци закана за домовите во селото Чифлик


Штип, 14 март, 2016 - 16:35 (META) 

Испуштените води од браната „Калиманци“ го зголемиja водостојот на реката Брегалница што претставува закана за десетина куќи во кочанското село Чифлик, каде според општината Чешиново–Облешево нема заштитни бедеми.

Водата е дојдена до дворовите на куќите, а жителите реагираат дека таа требало да се испушти порано, пред врнежите.

Раководителот на Регионалната водостопанска организација, Никола Гацов, информира дека се испуштаат 49 кубни метри вода во секунда во Брегалница.

Превентивно кај штипско Ново Село се поставени вреќи со песок.

Патот за селото Теранци, кое беше отсечено неколку дена поради најдојдената вода, од денеска е повторно во функција.

Општина Кочани попладнево соопшти дека редовно се одвива сообраќајот и на патот Долни Подлог–Облешево.


Обилниот дожд не донесе големи поплави во источна Македонија


Штип, 13 март, 2016 - 15:00 (META) 

Насочувањето на облаците кон јужниот дел на Македонија го спаси кочанскиот и штипскиот регион од поголеми поплави и излевање на реката Брегалница. Во Берово врне снег, додека во пониските делови ситен дожд.

Од претходните врнежи поплавени се земјоделски површини во општината Чешиново-Облешево, а во одбрана на куќите во ризичното село Уларци, превентивно се распоредени вреќи со песок покрај реката Брегалница.

Сепак, врнежливата ноќ ги оставила без сон жителите на селото Чифлик, кое беше поплавено минатата година. Жителите сведочат дека цела ноќ станувале да проверат до каде е водата.

– Стравуваме од нови поплави. Поучени од ланските поплави, цела ноќ станувавме да провериме по дворовите до каде е дојдена водата. Само Господ да не спаси! Немаме каде да одиме, дома сме, па ќе видиме – сведочат жителите на Чифлик.

Според нив од дома ја слушаат бучава од реката што дополнително им внесува паника. Жителите се жалат дека водата за пиење е заматена и не е за употреба. Од Црвениот Крст била доставена пакувана вода, што треба да му се подели на населението.

Од друга страна, институциите смируваат и велат дека состојбата се следи и дека веќе се преземени превентивни мерки.

– Има одлив на водата на повеќе места, но направени се повеќе зафати за заштита – вели Никола Гоцев, директорот на регионалналната водостопанска организација.

Според Гацов, пробиен е одоводниот канал за Чешиново, а со механизација се расчистувани каналите на Злетовска река.

Но, и натаму е отсечено селото Теранци, чии жители понекогаш го користат заобиколниот пат преку Зрновски, или со цел ризик поплавениот пат до Облешево.

Сите погледи се свртени кон браната Калиманци, која прелива веќе неколку дена. Од водостопанство велат дека нема потреба од паника, бидејќи состојбата е под контрола.

Најризично останува штипско Ново Село, каде се поставени насипи. Меѓутоа, според надлежните, доколку дојде до поголем прилив, водата ќе се испушти во нивите во кочанско со цел да се спасат куќите во Ново Село.

Во штипско засега само се следи состојбата, но поголеми излевања на водата нема. Превентивно се покриени бунарите во реката Брегалница, од каде со вода се снабдува градот.


Се прелеваат браните Градче и Калиманци, подготвени 5.000 вреќи песок


Кочани, 12 март, 2016 - 13:11 (META) 

Додeка се најавуваат обилни врнежи од дожд во попладневните и во вечерните часови, тешката механизација е на терен во Кочанско за расчистување на неколку канали кои се закануваат со поплавување на селата Чифлик, Чешиново и Облешево.

Дополнително се градат наноси на реката Бегалница кај Чешиново за да се заштитат блиските куќи, кои минатата година настрадаа во поплавите. Синоќа заседавал Кризниот штаб, каде е договорено да се работи и на расчистување на теренот кај селото Уларци, кое е под закана на Злетовска Река.

Подготвени се повеќе од 5.000 вреќи со песок, како евентуална заштита во случај да надојде Брегалница. Доза грижа создава информацијата дека од синоќа почнаа да прелеваат браните Градче кај Кочани и Калиманци кај Македонска Каменица.

Од Калиманци истекуваат два до три литри вода во секунда, што дополнително ја комплицира состојбата. Сепак, вчерашниот ден без врнежи донесе намалување на водостојот на Брегалница. Кај мерното место кај штипско Ново Село има опаѓање на нивото на водата за 30 сантиметри. Но, и со ова опаѓање, водостојот го надминува критичното ниво.

Магистралниот пат Кочани – Делчево сè уште е во прекин, иако според „Македонија пат“, неофицијално е во функција. Се чека одобрување од сообраќајниот инспектор, иако поголемите одрони се расчистени. И понатаму се работи на заобиклни патеки околу големите одрони.

Речиси да нема пат во Источна Македонија каде нема одрони, соопштуваат од „Македонија пат“, но тие тековно се расчистуваат.

И понатаму се затворени патот Долни Подлог  – Облешево, кој превентивно е раскопан за протек на водата, додека до селото Теранци се оди преку подолгиот пат, преку Зрновци, бидејќи е затворен патот од Облешево.

Состојбата активно се следи, особено по најавата за нови врнежи.


Дождовите отсекоа село во Кочанско


Штип, 11 март, 2016 - 16:59 (META) 

Надојдените води од околните ниви го отсекоа од општината Чешиново – Облешево селото Теранци. Водата, според Општината, го поплави патот и влезот во мостот што води до селото, па сега жителите го користат подолгиот пат преку Зрновци.

Водата полека се повлекува, но патот сè уште е затворен. Како што соопшти портпаролката на Општината Чешиново – Облешево, Катерина Постолова, Министерството за земјоделство, шумарство и водостопанство обезбедило пумпи за испумпување на водата во случај на нови врнежи.

Во кочанскиот крај привремено е затворен патот меѓу Долни Подлог и Облешево поради насобраната вода. Патот на делови е прекопан за да може водата да се разлие.

Тешка механизација го проби патот меѓу Истибања и Калимаци каде имаше огромни карпи, но сè уште не е ставен во употреба магистралниот пат Кочани – бугарска граница.

Екипите на „Македонија пат“ треба да поминат уште еднаш и да ги исчистат остатоците од одроните. Техничкиот директор на регионалниот центар на „Македонија пат“, Киро Коцев, не можеше да потврди дека до вечер овој пат ќе биде во функција. На месатата каде се наоѓаа големите одрони, направено е проширување, а дел од одроните остануваат како заштита од нови.

Умерениот ден со врнежи во Источна Македонија донесе пад на водостојот во реката Брегалница. Од утринските 312 сантиметри кај штипско Ново Село, попладнево нивото падна на 304 сантиметри. Се очекува трендот на пад на водостојот да продолжи со оглед на тоа дека помали врнежи имаше само во крајниот дел на Источна Македонија.


Закани од поплави во Источна Македонија


Скопје, 11 март, 2016 - 11:13 (META) 

Критично е нивото на реката Брегалница кај Ново Село во Штип, каде и лани имаше поплави. Нивото на водата е 312 сантиметри, а надминувањето на нивото од 250 сантиметри се смета за критично. Лани во време на големите поплави во Источна Македонија, водостојот на Брегалница изнесуваше 380 сантиметри. Вообичаено нивото на реката е околу 120 сантиметри. Добрата вест е дека во периодот од  7  до 9 часот на мерното место во Ново Село, нивото на вода опаднало за 4 сантиметри.

Во Штип, сè до ноќеска, врнеше без прекин речиси 30 часа. Според хидрометеоролозите, во изминатите 24 часа најмногу дожд наврна во Виница, од каде доаѓаат притоките на Брегалница – 30 литри на еден квадратен метар, додека во Берово, каде извира реката, наврнаа 27 литри дожд на еден квадратен метар.

Интензивниот дожд речиси го затрупа патот Истибања – Калиманци.

Техничкиот директор на регионалниот центар на „Македонија пат“, Киро Коцев, чија механизација ги расчистува одроните, вели дека огромни карпи има на неколку места, а со поситни одрони е посипан речиси целиот пат.

– Почвата е презаситена со влага, по што се одронуваат карпите од ридовите. Нема друго решение освен расчистување на паднатото  изјави Коцев, кој не знае кога ќе успеат да ги расчистат одроните, бидејќи постојано паѓаат нови.

На терен работат и три машини од „Гранит“ на отстранување на карпите и на одроните. Прво се дробат карите, па потоа се фрлаа во коритото на реката.

Додека работат екипите на „Македонија пат“, кај Истибања и понатаму паѓа дожд. Лошата вест е дека во претстојниот викенд се очекуваат нови, интензивни врнежи од дожд  кога се очекува да наврне до 30 литри дожд на еден квадратен метар.


Се бара виновникот за поцрвенувањето на Брегалница


Штип, 6 октомври, 2015 - 15:26 (META) 

Водата во реката Брегалница рано претпладне целосно се избистри. Синоќа речиси два часа течеше црвена вода. Кај населбата Македонка, на местото каде водата беше најцрвена, беше државниот еколошки инспектор Владимир Черкезов, кој зел примероци од водата.

– Не знаеме од каде истекуваат црвените води. Граѓани пријавија и во саботата. Излегов на терен и пет часа барав начин да дојдам до виновникот. Во близина се наоѓа поранешната фабрика „Македонка“, каде има четири капацитети што работат со боење, но во тој момент ниту еден не работеше, а водата истекуваше – рече Черкезов.

Вчера не беше првпат Брегалница да поцрвени. Во петокот водите добиле темносина, речиси црна боја, додека најсилно било обојувањето во саботата, кога на местото бил и инспекторот Черкезов.

– Има некоја инсталација која врши обојување, зедовме мостри, ќе бидат дадени на анализа и по неколку дена ќе дадеме наше видување – изјави инспекторот Черкезов.

Концесионерот на Брегалница, спортско-риболовното друштво (СРД) „Брегалница“, за оваа појава алармирал уште минатата недела. Нема помор на живиот свет, но, според секретарот на друштвото, Благој Димитров, обојувањето е речиси секојдневно и тој прашува дали некој помислил дека водата поминува низ бунарите од кои со вода за пиење се снабдувааат граѓаните на Штип.

– Жално е што водата поминува низ бунарите, од каде вода пие цел Штип. Оваа црвена боја е со години присутна и не верувам дека тој што испушта има еколошка дозвола – вели Димитров.

Во Центарот за јавно здравје, кој го контролира квалитетот на водата за пиење, денеска не можевме да добиеме информација дали водата за пиење одговара на стандардите за квалитет. Директoрот не се јавуваше на телефон, ниту, пак, некој друг одговори на службениот телефон на Центарот.