Се урнаa воени авиони во Србија и во Алжир, загинаа над 200 луѓе


Белград, 11 април, 2018 - 11:57 (META) 

Во две одвоени несреќи на воени авиони, во Јужен Банат во Србија и во Алжир, загинаа над 200 луѓе.

Според српските медиуми, во 9.30 часот во регионот Јужен Банат во Србија, меѓу селата Ковачица и Идвор, се урнал школско-борбен авион Супергалеб Г4, откако претходно двајцата пилоти се катапултирале, но за жал едниот од нив загинал при падот на земја. Другиот со тешки повреди бил префрлен на Војно-медицинската академија (ВМА) во Белград.

Увидот е во тек.

Во големата несреќа што се случила утрово во Алжир, пак, загинале најмалку 200 луѓе. Воен транспортен авион што превезувал војници и воена опрема се урнал околу 8 часот недалеку од аеродромот „Буфарик“ на југот на Алжир. Од авионот се извлекуваат десетици мртви тела.


Турски авион приземјен во Алжир поради лажна тревога за бомба


Алжир, 25 јули, 2017 - 20:13 (META) 

Авион на компанијата „Туркиш ерлајсн“ е приземјен на аеродром во Алжир поради лажна тревога за подметната бомба, соопштија алжирските власти.

Пилотот на авионот, кој летал од Истанбул за Мароко, одлучил да го приземји леталото во главниот град на Алжир затоа што една од патничките рекла дека поседува бомба, соопшти претставник на компанијата „Ер Алжир“, кој побарал да остане анонимен.

Според изворот, извршено е пребарување и не е пронајдена никаква експлозивна направа.
Како што се наведува, патничката што тврдела дека има бомба не е по потекло од Алжир, но безбедносните служби ја задржале на распит.


Алжир прогласи осумдневна жалост поради смртта на Фидел Кастро


Алжир, 27 ноември, 2016 - 15:00 (META) 

Алжир прогласи осумдневна жалост поради смртта на кубанскиот револуционер и поранешен претседател Фидел Кастро.

Алжирските медиуми го опишаа Кастро како голем пријател на Алжир, кој дал голема поддршка на земјата во отпорот против Франција во периодот од 1954 до 1962 година.

Кабинетот на претседателот на Алжир соопшти дека претседателот Абдулазиз Бутефлик донел одлука за осумдневна жалост по повод смртта на Фидел Кастро, а одлуката стапува на сила утре.

Кубанската власт прогласи деветдневна жалост поради смртта на Кастро, која ќе заврши на 4 декември кога и ќе биде положена неговата урна во градот Сантијаго де Куба.


ИД ја презеде одговорноста за убиството на полицаец во Алжир


Алжир, 31 октомври, 2016 - 10:11 (META) 

Исламска држава ја презеде одговорноста за убиството на алжирскиот полицаец, кој бил убиен додека вечерал во ресторан.

Екстремистите, наводно, во петокот убиле полицаец и му го зеле оружјето во градот Константин, 400 километри источно до главниот град Алжир, јави исламистичката агенција „Амак“.

Милитантите објавија слики од оружјето што го одзеле од полицаецот.

Алжирските власти потврдиле дека „непозната терористичка група“ го убила полицаецот, но не објавија повеќе детали.

ИД се обидува да се прошири и во Алжир, земја во чиј северен дел разгранок имаат Ал каеда и други екстремистички организации, кои долго се бореа против алжирските власти.


Еден загинат и 60 повредени во железничка несреќа во Алжир


Алжир, 25 септември, 2016 - 10:47 (META) 

Најмалку едно лица загина, а 60 се повредени во судир на два воза кај алжирскиот град Бумардес, јавуваат локалните медиуми.

Веста за железничката несреќа ја потврди и директорот на националната железница на Алжир, Јасин Бенџабалах.

Возовите сообраќале на релација меѓу главниот град Алжир и Тенија. Повредените патници веднаш се хоспитализирани.

Засега не се откриваат повеќе детали за тоа како дошло до несреќата.


Се урна воен хеликоптер во Алжир – загинаа 12 војници


Алжир, 28 март, 2016 - 10:21 (META) 

Дванаесет алжирски војници загинаа во пад на хеликоптер, објави алжирското министерство за одбрана.

Во соопштението се наведува дека несреќата се случила во покраината Адрар, на југозападот на земјата и оти уште двајца војници се повредени.

Истрагата е во тек, но причина за несреќата веројатно е лошата видливост која е последица на песочните бури кои во последните денови го зафатија регионот.


Убиени 22 милитанти во Алжир


Алжир, 20 мај, 2015 - 10:42 (META) 

Најмалку 22 милитанти поврзани со Исламска држава се убиени во нападот на алжирските војници, соопшти алжирското Министерство за одбрана.

Војниците им поставиле заседа на милитантите во моментот кога имале состанок источно од главниот град Алжир, во близина на местото Буира. Регионот е познат како упориште на милитантите.

– Ова е најголема антитерористичка операција, најголема според бројот на убиените милитанти – соопшти неименуван безбедносен извор, кој додава дека мета биле припадниците на одредот „Војници на калифатот“, кој е подгрупа на Ал каеда.


Претседателот на Алжир хоспитализиран во Франција


Алжир, 15 ноември, 2014 - 9:21 (META) 

Алжир – Абделазис Бутефлика е префрлен во болница во Франција, јавуваат светските новински агенции, цитирајќи неименувани извори од една приватна болница во Гренобл.

Засега не се знае каква е здравствената состојба на 77-годишниот Бутефлика, ниту, пак, од кои причини е хоспитализиран.

Алжирскиот претседател минатата година преживеа мозочен удар, по кој неколку месеци беше на лекување во Франција. По закрепнувањето, Бутефлика се врати во Алжир и учествуваше на претседателските избори, на кои го освои четвртиот мандат по ред.