Неколку илјади претежно млади лица, незадоволни од победата на Александар Вучиќ на претседателските избори во Србија, и денеска излегоа во центарот на Белград, на четвртиот по ред „Протест против диктатурата“, јавува дописникот на „Мета“ од Белград.
Учесниците на протестот, кој е организиран преку „Фејсбук“, носеа знамиња на Србија и транспаренти со натписи „О (не)свести се“, „Вучиќ арамијо“, „Долу диктатурата“, „Денеска сум на улица за утре да не живеам на неа“…
Демонстрантите бараат намалување на бројот на членови во Републичката изборна комисија (РИК) и во Регулаторното тело за електронски медиуми (РЕМ) поради неправилности за време на кампањата за претседателските избори, смена на претседателката на српското собрание, Маја Гојковиќ, и против раководството на српската национална радиотелевизија поради „режимското известување и нерамномерната застапеност на кандидатите“, како и за средување на избирачкиот список.
Демонстрантите денеска се движеа по малку изменета рута, која се држи во тајност за да се избегнат инциденти.
„Протестите против диктатурата“ продолжија и во Ниш и во Нови Сад, каде за сабота е најавен контрамитинг на приврзаниците на Александар Вучиќ.
Вучиќ денеска повторно изјави дека протестите на улиците се доказ дека Србија е демократска држава. Сепак, двајца од неговите министри, за полиција, Небојша Стефановиќ, и за труд, Александар Вулин, ја обвинија опозицијата за организирање на протестите и предупредија дека изборната волја не може да се смени на улица.
