Комисијата за спречување и заштита од дискриминација (КСЗД) ќе поднесе барање за покренување прекршочна постапка против градоначалникот на Општина Карпош, Стевчо Јакимовски, бидејќи не постапил по нивните препораки за спречување на дискриминацијата на лицата со попреченост во врска со пристапот до канцелариите за комуникација на граѓаните со подрачните пратеници, пишува Порталб.мк.
Врз основа на истражувањето на Порталб.мк објавено на 24 септември 2022 година, во декември 2022 година, КСЗД донесе мислење преку кое констатира дека Општина Карпош извршила дискриминација кон граѓаните со попреченост, кои се жители на оваа општина, прекршувајќи го истовремено и Уставот. Како што соопшти Порталб.мк, канцелариите се наоѓаат на надвозникот „Влајко“, каде што лифтовите и електричните скали не работат.
По констатирање на дискриминацијата, Комисијата ѝ дала на Општина Карпош две препораки со конкретни рокови:
- Општина Карпош да изработи акционен план со специфицирање на конкретни активности, временски рокови и финансиски импликации за овозможување на соодветно прилагодуваље кое ќе им овозможи пристап на лицата со попреченост до канцелариите за контакт на граѓаните со пратениците на Собранието на Република Северна Македонија. Општина Карпош е задолжена да постапи во согласност со оваа препорака и да го достави акциониот план писмено или во електронска форма до Комисијата за спречување и заштита од дискриминација во рок од 30 дена од денот на приемот на мислењето.
- Општина Карпош ќе ги реализира сите неопходни мерки и активности за овозможување на соодветно прилагодување со кое ќе се овозможи пристапот на лицата со попреченост до канцелариите за контакт на граѓаните со пратениците на Собранието на Република Северна Македонија. Општина Карпош е задолжена да постапи согласно оваа препорака и да го отстрани прекршувањето на правото во рок од 180 дена од приемот на мислењето и за истото да ја извести Комисијата за спречување и заштита од дискриминација.
Меѓутоа, предвидениот рок од 180 дена, односно шест месеци е изминат, но од Општина Карпош сè уште не ја отстраниле дискриминацијата.
Од КСЗД велат дека за ова, тие отпочнале дејствија за поднесување на барање за покренување на прекршочна постапка, против одговорното лице, што во конкретниот случај е градоначалникот.
„Ве информираме дека до денот на доставување на овој одговор, Комисијата не добила писмено известување за постапување согласно препораките од страна на лицето на кое истите се поднесени, за што, согласно Законот за спречување и заштита од дискриминација отпочнати се постапки за поднесување на барање за покренување на прекршочна постапка“, велат од Комисијата.
Порталб.мк побара став од Општина Карпош, меѓутоа оттаму не добивме одговор.
Претходно, од оваа општина изјавиле дека ќе ги реализираат препораките на КСЗД за конкретниов случај, но такво нешто, според верификациите на Порталб.мк сè уште не се случило.
Последниот пат екипата на Порталб.мк местото го посети на 23 мај, но како и првиот пат, и при оваа посета вратата на Канцеларијата беше затворена. За иронија, до оваа канцеларија, над мостот, се наоѓа и „Инфо канцеларијата за домашна помош и нега“. Вратите на оваа канцеларија се покриени со фотографии на стари лица на кои им помагаат медицински сестри и медицински персонал.
„Нега за стари лица во домашни услови во Општина Карпош. Бидејќи само домот е дом“, се вели во натписите.
Но, овие натписи не се во можност да ги видат старите лица и тие со попреченост бидејќи се наоѓа на мостот со 30 скали, каде што не работат ниту лифтот ниту електричните скали.
Според написот на Порталб.мк, граѓаните треба да ги бараат насекаде вработените на Канцелариите за контакт со граѓаните, кои се ангажирани на одредено работно време да овозможат комуникација на пратениците со граѓаните. Порталб.мк посети 4 канцеларии на различни локации, односно Тетово, Чаир, Карпош и Шуто Оризари за да види одблизу како функционираат. Според тоа што го видовме на терен, овие канцеларии не го почитуваат работното време, додека некои од нив не одговараат ниту на телефонски повици. Граѓаните имаат потешкотии да контактираат со претставниците на пратениците кои треба да ги сослушаат нивните грижи и потреби, за потоа истите да се доставуваат до Собрание за да се изнајде одредено решение.
- Целосниот напис: РСМ, канцелариите за комуникација на пратениците со граѓаните, затворени во тек на работното време (Инфографик)
- Одлука: Комисијата за Антидискриминација го потврди истражувањето на Порталб: Општина Карпош ги дискриминира лицата со попреченост
- Линк од претходни написи: Општина Карпош сè уште не го поправила лифтот кај Канцеларијата за комуникација на граѓаните со пратениците во Карпош
- Линк од претходни написи: Шест месеци Општина Карпош не направила ништо за да им овозможи пристап на лицата со попреченост до Канцеларијата на Пратениците
