Белгиското јавно обвинителство денеска официјално го обвини Салех Абдеслам за негова поврзаност со нападите во Париз во ноември минатата година, соопшти неговиот адвокат Свен Мери.
Мери најави дека во оваа фаза од постапката ќе бара Абдеслам да не биде екстрадиран во Франција, иако францускиот претседател, Франсоа Оланд, уште синоќа најави дека Париз ќе бара негова екстрадиција од Белгија.
Адвокатот додаде и дека за време на денешниот распит Абдеслам соработувал со белгиската полиција.
Абдеслам беше упасен вчера за време на акција на белгиската полиција во Брисел.
При акцијата Абдеслам беше ранет во ногата, поради што ноќата ја мина в болница.
Утрово тој беше отпуштен од болницата и беше префрлен на сослушување во полициска станица.
Заедно со Абдеслам вчера беа уапсени уште четири лица, сите членови на семејството во чии стан тој се криел.
Абдеслам е осомничен за давање логистичка поддршка на извршителите на ноемвриските напади во Париз.
