Измените и дополнувањата на Законот за кривична постапка денеска ќе се најдат пред пратениците во Собранието.

Во измените, пратениците Светлана Јакимовска од ВМРО-ДПМНЕ и Муса Ибраими од ДУИ по иницијатива на шест адвокати бараат да се смени рокот предвиден во законот во кој одбраната треба да прибере докази кои се во нејзин прилог.

Рокот предвиден во постоечкиот закон е 15 дена, а со измените се бара тој да се зголеми на 90 дена. Од пратеничката група на СДСМ вчера рекоа дека овој закон е обид да се одложи постапувањето на Специјалното јавно обвинителство.

Пратениците денеска ќе расправаат и за предлог – законите за изменување на Законот за заштита на природата, Законот за управување со отпадот, Законот за сигурност во железничкиот систем, Законот за градење, по скратена постапка.

Пред пратениците треба да се најде и Извештајот за активностите на Јавното обвинителство за гонење на кривичните дела поврзани и кои произлегуваат од содржината на незаконското следење на комуникациите за период од шест месеци.