![ruski napadi vrz Harkov](https://meta.mk/wp-content/uploads/2022/02/ruski-napadi-vrz-harkov.jpg)
Генералниот секретар на Обединетите Нации (ОН) Антонио Гутереш апелираше до рускиот претседател Владимир Путин да ги запре своите сили, додавајќи дека рускиот напад на Украина е најтажниот момент во неговиот петогодишен мандат.
„Претседателу Путин, запрете ги вашите сили од нападот на Украина. Дајте му шанса на мирот. Премногу луѓе веќе загинаа“, изјави тој отворајќи ја итната седница на Советот за безбедност на Обединетите Нации рано утрово.
Under the present circumstances, I must change my appeal:
President Putin, in the name of humanity, bring your troops back to Russia.
This conflict must stop now.
— António Guterres (@antonioguterres) February 24, 2022
„Во име на човештвото, вратете ги своите сили во Русија“, напиша на Твитер генералниот секретар на ОН, Гутереш.
Во тек е итна седница на Советот за безбедност на ОН. Амбасадорот на Украина во ОН Сергиј Кислица изјави дека рускиот претставник во ОН потврдил дека неговиот претседател Путин ѝ објавил војна на Украина.
Британскиот премиер Борис Џонсон утрово телефонски разговараше со украинскиот претседател Володимир Зеленски. Џонсон на Твитер напиша дека Обединетото Кралство и неговите сојузници ќе одговорат одлучно на неиспровоцираниот напад на Украина од страна на Русија.
I am appalled by the horrific events in Ukraine and I have spoken to President Zelenskyy to discuss next steps.
President Putin has chosen a path of bloodshed and destruction by launching this unprovoked attack on Ukraine.
The UK and our allies will respond decisively.
— Boris Johnson (@BorisJohnson) February 24, 2022
Германскиот канцелар Олаф Шолц го осуди нападот на Русија врз Украина, именувајќи го како страшен ден за Украина и мрачен ден за Европа.
Францускиот претседател Емануел Макрон силно го осуди рускиот напад врз Украина и побара од Русија веднаш да стави крај на воените операции. Макрон утрово разговараше со украинскиот претседател и свика седница на францускиот Совет за безбедност.
Генералната секретарка на Советот на Европа, Марија Пејчиновиќ Бурич денеска најостро го осуди рускиот напад врз Украина и побара Русија веднаш да ги прекине воените активности.
„Најостро го осудувам рускиот воен напад на Украина со којшто флагрантно се крши Статутот на Советот на Европа и Европската конвенција за човекови права“, изјави таа.
Високиот претставник на ЕУ за надворешна политика и безбедност, Жозеп Борел преку соопштение истакна дека Русија ќе се соочи со невидена меѓународна изолација и ќе плати висока цена за неиспровоцираниот акт на агресија кон Украина. Борел вели дека ова е еден од најмрачните часови за Европа по Втората светска војна.
„Ова не е само најголемо прекршување на меѓународното право, ова е прекршување на основните принципи на човекова коегзистенција“, додава Борел, најавувајќи дека Европскиот Совет вечерва ќе одржи состанок по рускиот напад врз Украина.