Советот за безбедност на сообраќајот на патиштата од Охрид, користејќи ја зголемената фреквенција на сообраќајот, денеска ја реализира едукативно-превентивната кампања „Вози одговорно – животот е во твои раце“.
– Целта е потсетување на сите учесници во сообраќајот за потребата од почитување на сообраќајните правила и прописи, внимателно управување со патничките моторни возила, мотоциклите и велосипедите. Кампањата треба да влијае врз подигнување на јавната свест за зголемена безбедност во сообраќајот и унапредување на сообраќајната безбедносна култура кај сите учесници во сообраќајот – вели претседателот на Општинскиот совет за безбедност на сообраќајот, Стефан Димоски.
Кампањата ќе биде реализирана во соработка со Полициската станица за безбедност во патниот сообраќај при СВР од Охрид.
Сообраќајната полиција ќе постави сообраќаен пункт кај селото Подмолје и на возачите на автомобилите и другите возила, низ советодавна комуникација, ќе им подели едукативни наменски летоци со низа практични совети за безбедно возење и зголемена сообраќајна безбедност.
