Поголема транспарентност и видливост на Собранието, како и можност за поголема вклученост на експертите во работата на собраниските комисии, биле дел од темите на кои на денешната средба разговарале претседателот на Собранието, Талат Џафери, и амбасадорот на Холандија во земјава, Ваутер Пломп.
Пломп, како што се наведува во соопштеноето од Собранието за средбата, ја пренел пораката за подготвеноста на холандската vлада за „широка соработка со институциите на Република Македонија и за продолжување на сите почнати проекти меѓу двете држави“.
Претседателот на Собранието, Џафери, го информирал холандскиот амбасадор за актуелната состојба во Собранието и за активностите кои следат во однос на меѓународната соработка, како формирањето на делегациите во меѓународните организации и групите за билатерална соработка.
„Соговорниците разменија мислења и за формите за поголема транспаретност и видливост на Собранието, односно подобро запознавање на граѓаните со работата на законодавниот дом. Притоа, беше нагласена и потребата за поголема вклученост на експертите во работата на собраниските комисии, како можност која ја дава деловникот за работа на Собранието, за тие да придонесат за донесување поквалитетни законски решенија“, стои во соопштението.
