Украина успеа да врати уште 103 воини од руско заробеништво, пренесе агенцијата Украинформ. Претседателот Володимир Зеленски денеска напиша на Телеграм дека во Украина се вратиле 82 војници и 21 офицер.
„Нашите луѓе се дома. Успешно вративме уште 103 воини од руско заробеништво во Украина, бранители на регионите Киев и Доњецк, Мариупол и Азовстал, Луганск, Запорожје и Харков. Воини на вооружените сили на Украина, Националната гарда на Украина, граничари и полицајци. Му благодарам на нашиот тим за размена што испорача толку добри вести за Украина“, напиша Зеленски.
Како што е соопштено, 49 Украинци беа вратени дома од руско заробеништво во петокот, 13 септември. Меѓу нив и Леније Умерова, млада жена земена како заложник од Русите кога дошла да се грижи за својот болен татко. Ослободени се и повеќе бранители на Азовстал. Виктор Ивчук, воен лекар и херој на Украина, исто така се врати дома.
