!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Фестивалот „Макфест“ повторно ќе се одржува во октомври


Штип, 8 март, 2017 - 15:43 (META) 

Фестивалот на забавна музика „Макфест“ се враќа на старите датуми на одржување, односно на 5, 6 и на 7 октомври.

Според директорот на „Макфест“, Љупчо Мирковски, стариот датум се враќа на барање на штипјани, кои изданието на овој фестивал го врзуваат за месецот октомври.

Мирковски соопшти дека е завршен конкурсот за нови песни, а од денеска комисијата почнува да ги преслушува пристигнатите 140 композиции.

– Дел од нив се од домашни, а дел од странски автори. Благодарение на тоа што го правевме минатата година со странските изведувачи, малку се прошири веста низ Европа дека овде има фестивал кој заслужува да му се обрне многу внимание. Има песни од Киргистан, Белорусија, Шведска, Норвешка, Германија, Куба и од Шпанија – соопшти Мирковски пред новинарите.

Годинава ќе има новини во гласањето, а наградите остануваат исти. Како и досега, првата награда изнесува 10.000 евра, втората – 7.500 евра, а третонаградената композиција добива 5.000 евра.

Традицијата со одржување на фестивалот беше прекината изминатите неколку години и фестивалот се одржуваше во јуни.


Парични казни за 300 штипјани оти заборавиле да пријават дека платиле данок


Штип, 30 јуни, 2016 - 18:41 (META) 

Парични казни од 100 евра треба да платат околу 300 штипјани, главно издавачи на станови, кои платиле данок, но не пријавиле дека го сториле тоа.

Тие, главно поради неинформираност, не поднеле аконтативна даночна пријава, со која се пријавува дека е платен данокот на остварениот приход.

На нивните домашни адреси деновиве почнале да пристигнуваат решенија со кои се казнуваат поради тоа што не пријавиле остварен приход од издавање станбен или деловен простор.

Од Управата за јавни приходи (УЈП) велат дека речиси десет години водат информативна кампања и повеќе нема да се толерира непријавувањето данок.

Според законот, обврзникот е должен да поднесе аконтативна даночна пријава во рок од 15 дена од денот на остварувањето на приходот.