!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Омбудсманот реагира на забраната ученички со шамии да следат настава


Скопје, 19 септември, 2017 - 14:49 (META) 

Народниот правобранител денеска соопшти дека ја осудува постапката на Министерството за образование и наука кое, како што се наведува во реакцијата, со допис му овозможило на директорот на Основното училиште „Братство и единство“ во Охрид да им забрани на ученички да посетуваат настава затоа што носеле шамија на главата.

Омбудсманот бара веднаш да се повлече ваквата одлука и на ученичките да им се овозможи да ја следат наставата.

„Уставот на Република Македонија и Европската конвенција за човекови права предвидуваат и дозволуваат слобода на вероисповед и слобода на изразување на религијата, а според Конвенцијата за правата на детето, слободата на манифестирање на вероисповедта може да потпаѓа само под ограничувања предвидени со закон, а вакви ограничувања не се предвидени со Законот за основно образование и со другите законски прописи“, стои во соопштението од канцеларијата на Народниот правобранител.

Омбудсманот бара доследно почитување на законите и задолжителна примена на ратификуваните меѓународни акти, како составен дел на македонскиот правен поредок.