Утре се одржува четвртиот самит FMCG за професионалци од секторот за трговија


Скопје, 16 мај, 2018 - 15:22 (META) 

Четвртиот самит FMCG (Fast-moving consumer goods) ќе се одржи утре во хотелот „Александар Палас“ во организација на магазинот „InStore“.

Десет говорници, десет истакнати професионалци од секторот за трговија со стока за широка потрошувачка (FMCG) од Македонија, регионот, како и од Русија, ќе ги споделат своите знаења и искуства пред повеќе од 300 професионалци од средниот и топ менаџментот на македонските компании.

Самитот ќе го отвори Енвер Малиќи, сопственик на „Гемак“, една од водечките компании во FMCG индустријата во Македонија, кој со присутните ќе ја сподели својата инспиративна бизнис-приказна.

Главен говорник на самитот ќе биде Миодраг Боројевиќ, извршен директор на рускиот синџир маркети „Океј“, кој ќе ги презентира предностите на македонските производствени компании и можностите за пласман на рускиот пазар.

Џорџ Ангелакис, сениор консултант на Европската банка за обнова и развој, која воедно е и програмски поддржувач на самитот, пред присутните ќе ги претстави најуспешните менаџмент-практики од FMCG-индустријата.

Останатите говорници ќе дадат одговори на прашањата: Дали разбираме како иновациите, дигитализацијата и големите бази на податоци влијаат врз работењето? Како познавањето на трендовите да се претвори во предност на пазарот? Како да се пронајде формулата за успех на пазарот?

„Магазинот „InStore“ четврта година по ред го организира FMCG самитот, кој е уникатен настан за споделување знаење и искуство, за размена на идеи и за подигнување на културата на FMCG-секторот на едно повисоко ниво“, изјави Верица Мартиновска, директорка на магазинот „InStore“ во Македонија.


Вториот FMCG-самит ќе се одржи на 13 мај во хотелот „Александар палас“


Скопје, 21 април, 2016 - 10:11 (META) 

Вториот FMCG-самит ќе се одржи на 13 мај во хотелот „Александар палас“, во организација на регионалниот магазин за трговија со стока за широка потрошувачка „Инстор“ (InStore).

Во рамките на програмата ќе бидат опфатени домашни и регионални приказни на тема: лидерство, менаџмент со категории, преговарање и продажба, промоции и приватни трговски марки.

Ќе се одржат презентации, истражувања, тркалезна маса чија цел е инспирација, едукација, размена на идеи и целодневно дружење на учесниците на самитот.

Искуството од минатогодишниот FMCG-самит покажа дека на овој сектор и тоа како му е потребен ваков настан.

– Живееме во време на континуирана политичка и економска нестабилност. Сликата не е розова ниту во нашата земја, ниту во поширокиот регионален и светски контекст. Трговијата со стока за широка потрошувачка, како сектор што го карактеризираат секавични промени, се наоѓа распната меѓу потребата да биде во чекор со времето и принудата да ги трпи ударите на разните кризи. Но, бизнисот е секојдневна борба, исто како и животот и секогаш има победници. На FMCG-самитот ќе разговараме токму за тоа, како да се биде победник сега и тука, во времето и на местото каде што живееме и работиме – вели Верица Мартиновска, главна и одговорна уредничка на „Инстор“ – Македонија, магазин кој е организатор на овој настан.