Ангеловска Бежоска: Останува предизвикот за градење на независна монетарна политика


Скопје, 22 мај, 2018 - 12:21 (META) 

Анита Ангеловска – Бежоска денеска ја презеде должноста гувенерка на Народната банка од досегашниот гувернер Димитар Богов, на кој мандатот му истече вчера.

Во изјавата за медиумите таа се заблагодари на претседателот Ѓорге Иванов за нејзината номинација и на политичките партии кои што со широк консензус ја избраа за гувернерка.

Како што рече, оваа поддршка за неа е многу значајна, но и за целото општество бидејќи била поддржана професионалноста која е клучна за градење на прогресивно општество.

-Би сакала да му се заблагодарам на досегашниот гувернер Богов кој успешно ја водеше банката во критичните моменти. Бев дел од тимот кога ги поминувавме тие моменти, но благодарејќи на силниот институционален капацитет на централната банка, успешно ги поминавме – рече Ангеловска – Бежоска.

Таа потенцираше дека пред неа останува предизвикот за одржување на независна монетарна политика, но и макроекономска стабилност. Но како и досегашните раководни структури на банката, таа потенцираше дека ќе продолжи со градење на силен институционален капацитет на Централната банка, бидејќи го смета за клучен во извршувањето на задачите.

Претходно, Богов даде отчет за сработеното и рече дека двете клучни цели на банката се постигнати, односно постигната е ценовна и стабилност на банкарскиот сектор.

-Девизниот курс на денарот во однос на еврото беше одржан на стабилно ниво. Денарот не изгуби од конкурентност во однос на еврото, бидејќи инфлацијата за овие седум години од 1,5 проценти беше на слично ниво како во ЕУ од 1,2 проценти. Банкарскиот систем успешно се развиваше и растеше, така што активата и депозитите се зголемени за 50 проценти во однос на пред седум години – рече Богов.

Тој додаде дека за овие седум години, Народната банка успешно се справила со два силни, неповолни шокови како што беа грчката должничка криза во 2015 година и шпекулативниот напад врз монетарната стабилност во април и мај 2016 година. Имено, од 19 април до 23 мај 2016 година НБРМ интервенираше на девизниот пазар со продажба од 129 милиони евра, со што го затвори јазот помеѓу побарувачката и понудата на девизи и ја одржа стабилноста на девизниот курс.

Тој период, како што истакна Богов, во комбинација со политичката криза му бил најлошиот период за време на извршување на функцијата гувернер.

– Каматната стапка е на историско најниско ниво од 3 проценти. Секогаш постои дискусија дали може пониска, можеби и ќе можеше ако немаше политичка криза, но и дисциплинирана фискална политика – додаде Богов.

На прашањето на „Мета“ каде ќе ја продолжи кариерата, Богов рече дека сето ова набрзина му се случувало и дека ќе земе одмор па потоа ќе размисли што понатаму.

Неговата разделба со вработените беше прилично емотивна, бидејќи како што рече, таму поминал многу убави моменти и соработката со нив ја оцени како добра страна во работењето како гувернер.


Мандатот на Богов истекува денеска, на седницата нема точка за избор на гувернер


Скопје, 21 мај, 2018 - 9:34 (META) 

Мандатот на гувернерот Димитар Богов истекува денеска, на Собрание е закажана 46. седница од 11 часот, но на дневен ред ја нема точката за избор на гувернер.

Претседателот Ѓорге Иванов ја предложи вицегувернерката Анита Ангеловска Бежоска за гувернерка, откако Богов, кој беше предложен за втор мандат, се откажа од кандидатурата по реакциите и полемиките во јавноста за негов повторен избор.

Пратеничката група на СДСМ и коалицијата денеска на координација ќе го разгледаат предлогот на Иванов за Ангеловска Бежоска, но координаторот Томислав Тунтев најави дека таа ќе биде поддржана.

– Сметам дека Ангеловска Бежоска, која што е докажан експерт и професионалец во својата област, ја заслужува нашата поддршка. Само да потсетам дека лани летото ние како пратеничка група го искажавме нашиот афирмативен став и ја дадовме нашата поддршка за Анита Ангеловска Бежоска, кога го поддржавме и гласавме за нејзиниот реизбор на функцијата вицегувернерка – рече Тунтев.

Иако политичките партии беа разединети околу предлогот за гувернер, во едно беа обиденети, Народна банка да не се остави без гувернер.

ВМРО-ДПМНЕ и ДУИ не се изјаснија дали ќе ја поддржат Ангеловска Бежоска за оваа значајна функција.

Ангеловска Бежоска осум години е на функцијата вицегувернер во Народната банка задолженa за областите монетарна политика, истражување и статистика. Таа беше реизбрана за вицегувернер на Народната банка, на предлог на Богов, на 20 септември 2017 година во Собранието.


Иванов ја предложил Анита Ангеловска – Бежоска за нов гувернер на Народна банка


Скопје, 16 мај, 2018 - 14:44 (META) 

Откако Димитар Богов ја повлече кандидатурата за гувернер, претседателот Ѓорге Иванов ја предложил вицегувернерката Анита Ангеловска – Бежоска за нов гувернер на Народната банка и предлогот го доставил до Собранието, потврдија од кабинетот на Иванов за МИА.

Претседателот Иванов смета дека актуелната вицегувернерка, Анита Ангеловска-Бежоска, која доаѓа од редот на професионалците и раководните структури на Народната банка е решение за гувернерската позиција, со кое би се продолжил континуитетот на позитивното работење и успешното водење на монетарната политика.

Ангеловска-Бежоска осум години е на функцијата вицегувернер во Народната банка задолженa за областите монетарна политика, истражување и статистика. Таа беше реизбрана за вицегувернер на Народната Банка, на предлог на Богов, на 20 септември 2017 година во Собранието.

„Од 2004 до 2010 година Ангеловска-Бежоска била главен економист во НБРМ. Воедно, била ангажирана во Меѓународниот монетарен фонд во Вашингтон, во Одделот за макроекономски политики во европските земји и во Одделот за фискални политики. Ангеловска-Бежоска учествувала во повеќе преговарачки мисии на Меѓународниот монетарен фонд за склучување аранжмани меѓу Меѓународниот монетарен фонд и земји-членки. Од 1996 до 2004 таа има богато работно искуство во Министерството за финансии каде работела на повеќе позиции, од стручен соработник за финансиски систем, советник за подготовка и извршување на буџетот, раководител на секторот Трезор до државен секретар на Министерството за финансии. Ангеловска-Бежоска се стекнала со титулата доктор на науки на Економскиот факултет во Љубљана во 2015 година, а темата на нејзината докторска дисертација е „Координација на монетарната и фискалната политика во Република Македонија“, се вели во соопштението од кабинетот на Иванов за МИА.


Богов ја повлече кандидатурата за гувернер на Народна банка


Скопје, 16 мај, 2018 - 13:57 (META) 

На четири дена од истекот на мандатот, гувернерот на Народна банка, Димитар Богов се повлекува од кандидатурата за втор мандат и за тоа веќе го известил претседателот на државата Ѓорге Иванов, кој го предложи за нов гувренерски мандат.

Во пишаната изјава за МИА, Богов посочува дека со внимание ја следел дебатата во јавноста поврзана со предлогот по втор пат да биде именуван за гувернер на Народната банка и оти одлуката ја донел имајќи ги предвид реакциите на дел од чинителите во политиката и роковите за избор на гувернер.

– Во оваа пригода би сакал да му се заблагодарам на претседателот Ѓорге Иванов за довербата што ми ја даде со моето повторно предложување за прв човек на Народната банка, што за мене лично претставува валоризација на сработеното во изминатите седум години. Имајќи ги предвид реакциите на дел од чинителите на политичкиот живот во Македонија, моменталната политичка констелација и роковите за избор на гувернер, во интерес на државата се повлекувам од кандидатурата за гувернер на Народната банка, за што веќе го известив претседателот – вели Богов.

Тој верува дека во периодот што претстои ќе се изнајде решение и во најскоро време ќе биде предложен нов кандидат за гувернер на Народната банка, од редот на професионалците, кој ќе добие консензуална политичка поддршка.

– Народната банка не смее да се остави без гувернер. Очекувам решение во најкус можен рок, што ќе биде во интерес на Македонија – потенцира Богов.

Мандатот на Богов како гувернер на НБРМ завршува на 20 мај.


Богов: Граѓаните треба финансиски да се едуцираат, за да се избегнат ризици


Скопје, 11 мај, 2018 - 14:45 (META) 

Многу од проблемите при глобалната финансиска криза беа предизвикани од недоволната информираност и знаење на потрошувачите, рече денеска гувернерот Димитар Богов на отворање на настанот „Денови на финансиската писменост“ во „Скопје сити мол“ кој ќе трае до недела.

Затоа, како што кажа, важно е инстититуциите да ги едуцираат граѓаните за основните познавања од финансиската сфера.

„Она што во минатото беше читањето и пишувањето денес тоа се компјутерите и финансиската писменост. Потребно е подигањето на свеста за во иднина да се избегнат ТАТ, One coin, современи финансиски шеми кои носат финансиски ризици“, рече Богов и им порача на граѓаните да бидат внимателни и повеќе да се информираат од надлежните институции за финансиите и ризиците.

Министерот за финансии Драган Тевдовски рече дека со граѓанскиот буџет, целта била јавните финансии да се приближат до граѓаните, за тие полесно да разберат како се трошат нивните пари. Апелираше до нив, да ги дадат своите сугестии за тој да биде поразбирлив.

Тридневниот настан во „Скопје сити мол“, ќе овозможи едукација преку изложбен дел каде посетителите ќе можат да се информираат за сите финансиски параметри во врска со теми кои ги засегаат, ќе има презентации на одредени производи од учесниците, како и финансиско-едукативни активности за најмладите.


Иванов и Заев се согласиле единствено дека НБРМ не смее да се остави без гувернер


Скопје, 7 мај, 2018 - 15:03 (META) 

Народната банка не смее да се остави без гувернер, бидејќи тоа би имало негативни импликации врз економијата на државата, се согласиле претседателот Ѓорге Иванов и премиерот Зоран Заев на денешната средба во вилата Водно која се одржа на барање на премиерот, а на која се разговараше за предлогот на Иванов за нов гувернер на НБРМ.

Иванов, како и на претходната средба одржана на 26 март оваа година, на премиерот Заев му ги образложил ставовите и аргументите, зошто смета дека досегашниот гувернер Димитар Богов најодговорно ќе ја извршува оваа значајна функција.

На денешната средба, претседателот Иванов го запознал премиерот Заев дека пред да ја донесе одлуката, имал и средби со други потенцијални кандидати за гувернерското место.

„И на тие средби, не беше посочена ниту една забелешка за работата на актуелниот гувернер, ниту за работата на НБРМ. Напротив, сите соговорници го потврдија ставот дека Богов е најдоброто решение, кое е потврдено и во извешатите на Европската комисија“, се вели во соопштението на Иванов.

На средбата се разговарало и за законската регулатива за именување на гувернер. Било констатирано дека, согласно член 49 од Закон за Народната банка, гувернерот го именува Собранието, на предлог на претседателот.

Согласно своите овластувања, претседателот Иванов на 27 април 2018 година предлогот го доставил до Собранието. Мандатот на Богов завршува на 21 мај.


Заев и Иванов денеска ќе разговараат околу предлогот за нов гувернер на НБМ


Скопје, 7 мај, 2018 - 10:42 (META) 

На барање на премиерот Зоран Заев, денеска ќе се одржи втора средба со претседателот Ѓорге Иванов за усогласување на ставовите околу изборот на гувернер на Народната банка.

– Верувам дека по пат на кохабитацијата и дијалогот кој што го имаме ќе изнајдеме решение. Правото е апсолутно на претседателот да предложи, но правото е и на парламентарното мнозинство да избере гувернер. Оваа институција мора да ја држиме професионална. Разговараме за експертски решенија, не за партиски решенија, кои што и понатаму би ја чувале монетарната политика стабилна, затоа што и нас како Влада тоа ни е од голема важност за да можеме да ги креираме другите економски политики – изјави Заев одговарајќи на новинарски прашања.

Тој вели дека за предлогот на Иванов се информирал од медиумите.

– Како за предлозите за Уставен суд, така се случи и со предлогот за гувернер на НБРМ, се информиравме од медиумите – додаде Заев.

Од кабинетот на претседателот Иванов инфомираа дека претседателот, предлогот за гуврернер го доставил до Собранието на 27 април 2018 година.


Иванов предлогот за Богов за гувернер го доставил до Собранието на 27 април


Скопје, 4 мај, 2018 - 10:35 (META) 

Во врска со предлогот Димитар Богов повторно да биде гувернер на Народната банка, од кабинетот на претседателот Ѓорги Иванов информираат дека по сите консултации тој бил посочен како најквалитетна, најпрофесионална и најсоодветна личност за извршување на оваа функција и кандидирање за негов втор мандат.

„По извршените консултации, претседателот Иванов оствари средба со премиерот Заев на 26 март оваа година, на која македонскиот претседател го запозна премиерот за исходот од консултативните средби и дека Димитар Богов ќе биде предложен за нов мандат од страна на македонскиот претседател“, се вели во соопштението од кабинетот на Иванов.

Потоа, како што се додава во соопштението, следувала и средба на претседателот Иванов со гувернерот Богов на која била соопштена намерата.

– Откако актуелниот гувернер му дал согласност на претседателот Иванов за негова повторна кандидатура, Димитар Богов остварил средба со премиерот Заев на која му ја искажал согласноста за одлуката на македонскиот претседател за негова повторна кандидатура. За предлогот Димитар Богов да биде гувернер на НБРМ, освен премиерот Заев, информиран е и лидерот на опозицијата, Христијан Мицкоски – велат од кабинетот на Иванов.

Оттаму информираат и дека претседателот Иванов изминатиот период остварил и средби со други потенцијални кандидати за гувернерското место, меѓу кои и со Фатмир Бесими.

„На сите тие средби, не била посочена ниту една забелешка за работата на актуелниот гувернер, ниту за работата на НБРМ. Напротив, на сите средби преовладувал ставот дека Богов заслужува повторна кандидатура и дека е најдоброто решение, кое е потврдено и во извештаите на ЕК“, велат од кабинетот на претседателот Иванов.

Согласно своите овластувања, претседателот Иванов на 27 април 2018 година предлогот го доставил до Собранието.


Делегација предводена од Тевдовски и Богов на Пролетни средби на ММФ и СБ во Вашингтон


Вашингтон, 20 април, 2018 - 9:30 (META) 

Делегација предводена од министерот за финансии, Драган Тевдовски и гувернерот на Народната банка, Димитар Богов од денеска учествува на редовните Пролетни средби на Светска банка и Меѓународниот монетарен фонд во Вашингтон.

Предвидено е делегацијата да оствари средби со високи претставници на Светска банка, Меѓународниот монетарен фонд, Европската инвестициска банка, Централната банка на Европа и Меѓународната финансиска корпорација (ИФЦ).

Во рамки на средбите закажани се состаноци со заменик претседателот на Светска банка за Европа и Централна Азија, Сирил Милер, со извршниот директор на Светска банка, Френк Хемскирк, со Пол Томсен, извршен директор на ММФ за Европа и шефот на мисијата на ММФ за Македонија, Јасмин Рахман.

Во фокусот на разговорите ќе бидат тековната и идната соработка на Македонија со двете институции.

Пролетните состаноци на ММФ и Светска банка се одржуваат секоја година. На настанот учествуваат министри за финансии и гувернери на централните банки на земјите членки. Дискусијата е поврзана со актуелните случувања во светската економија и на теми како намалување на сиромаштијата и потикнување на економскиот раст.


ЕУ треба да се подготви за зголемување на каматните стапки, порачаа банкарите од Охрид


Охрид, 13 април, 2018 - 14:26 (META) 

Сите ние треба да им кажеме добредојде на повисоките каматни стапки, најави Бас Бекер од регионалната канцеларија на Меѓународниот монетарен фонд за Централна и Источна Европа на прес-конференцијата во Охрид за време на одржувањето на седмата годишна истражувачка конференција на Народната банка на Македонија.

– На оваа конференција главно прашање е кое ќе биде влијанието на движењето на каматните стапки во Западна Европа врз економиите. Секоја година стапката на невработеност се намалува за 1,5 отсто и во вакво опкружување не треба многу ниска каматна стапка. Каматната стапка Европската централна банка (ЕЦБ) ја зголемува само кога порастот е висок и мислам дека нејзиното зголемување ќе продолжи и ќе се засилува. За порастот да остане одржлив, продуктивноста треба да се зголемува – изјави Бекер.

Гувернерот на централната банка на Белгија, Јан Сметс, изјави дека Европската централна банка отворено ќе ја комуницира монетарната политика за да можат економиите од овој регион да се прилагодат.

Димитар Богов, гувернерот на НРБМ,  вели дека ние ќе ја следиме и соодветно ќе ја прилагодиме нашата монетарна политика кон промените што се најавуваат.

– Во такви услови ние проценивме дека кај нас се подобрија одредени аспекти кои во претходниот период можеби предизвикуваа повисока премија за ризици и потоа беа создадени услови каматната стапка да ја намалиме на 3 отсто. ЕЦБ, според сите досегашни најави, може ќе започне со зголемување на каматната стапка од наредната година, но тоа би одело постепено – рече Богов.

Заменик директорот во Европската банка за обнова и развој, Питер Санфеј, вели дека е пријатно изненаден од добрите изгледи на економијата не само за Македонија, туку и за земјите од регионот кои што имаат изгледи за понатамошен пораст.

Директорот „Џоин Виен институт“, Томас Ричардсон рече дека земјите треба да изградат здрави фундаменти во економијата и затоа се многу важни структурните реформи, инвестициите во инфраструктурата и во човечкиот капитал.

На прашањето за актуелната трговска војна што се случува во САД, ЕУ и Кина, Сметс рече дека може да доведе до негативен економски пораст заради зголемувањето на увозните цени, а со тоа и куповната моќ на граѓаните.

– Може да доведе и до недоверба на потрошувачите и инвеститорите како резултат на лошата состојба на пазарот на капитал. На долг рок може негативно да влијае на порастот на продуктивност – додаде Сметс.