!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

СДСМ го осуди пукањето врз Никола Тодоров


Скопје, 1 јуни, 2017 - 14:22 (META) 

Социјалдемократскиот сојуз на Македонија го осуди инцидентот во кој 60-годишниот Љ.С. од селото Каласлари, Велешко, пукаше во поранешниот министер за здравство и висок функционер на ВМРO-ДПМНЕ, Никола Тодоров.

„СДСМ најостро го осудува инцидентот во кој е пукано во поранешниот министер за здравство, Никола Тодоров. Недозволиво е употреба на оружје и посегнување по нечиј живот, од која било причина, какви што се првичните информации за случајот. Повикуваме на институционално решавање на проблемите. Очекуваме надлежните органи целосно да го расветлат инцидентот“, стои во соопштението на СДСМ.

Според првични и неофицијални информации од истрагата, 60-годишниот Љ.С. е дедо на деветгодишната Тамара Димовска, која имаше искривување на ’рбетот и почина во февруари 2015 година, чекајќи од Фондот за здравствено осигурување средства за операција во странство.


Дедото на малата Тамара пукал во Никола Тодоров


Скопје, 1 јуни, 2017 - 13:47 (META) 

Шеесетгодишниот Љ.С. од селото Каласлари, Велешко пукал во поранешниот министер и член на извршниот комитет на ВМРО-ДПМНЕ, Никола Тодоров, потврдуваат од Министерството за внатрешни работи (МВР).

Оттаму информираат дека осомничениот истрелал два куршуми од пиштол кон Тодоров. Во инцидентот, според МВР, нема повредени. Напаѓачот е веднаш уапсен и однесен во полициска станица, каде во тек е истрагата за случајот.

Дел од медиумите, повикувајќи се на првични и неофицијални информации од истрагата, објавија дека 60-годишниот Љ.С. е дедо на деветгодишната Тамара Димовска, која имаше искривување на ’рбетот и почина во февруари 2015 година, чекајќи од Фондот за здравствено осигурување средства за операција во странство.

Мајката на Тамара, Жаклина Димовска, во изјава за „Нова ТВ“ потврди дека лицето што стрелало во поранешниот министер Никола Тодоров е нејзиниот татко. Таа вели дека е во шок и дека за нападот пред Министерството за здравство дознала од медиумите.

„Ништо не наговестуваше дека планирал такво нешто. Не знам од каде нашол пиштол. Револт во семејството постои, но никој не помислил на вакво нешто, не очекував дека ќе се случи ова. Убиството не е решение. Ова е шок за мене, го осудувам насилство иако ми е татко. Цел живот се борев за правда и еве што се случи“, изјавила Димовска.

Неофицијално, напаѓачот пукал во Тодоров додека тој влегувал во зградата на Министерството за здравство, каде во 12.30 часот денеска требаше да се биде извршено примопредавање на функцијата помеѓу Тодоров и новиот министер за здравство, Арбен Таравари.