!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Хојт Ји: Договорот меѓу Македонија и Бугарија е важен за целиот регион


Блед, 5 септември, 2017 - 11:01 (META) 

„Го поздравувам Договорот за пријателство, добрососедство и за соработка со Република Македонија. Тој е важен за народите на Република Бугарија и на Република Македонија, но и за целиот регион“.

Ова го изјавил заменик-помошникот државен секретар на САД, Хојт Брајан Ји, на средбата со бугарската вицепремиерка и министерка за надворешни работи, Екатерина Захариева, во рамките на Бледскиот стратешки форум во Словенија, соопшти бугарското МНР.

– Се надевам дека овој договор ќе создаде одлична атмосфера, во која Република Македонија ќе ги подобри односите и со другите соседи – додал Ји.

Захарива на средбата истакнала дека една од најголемите придобивки на договорот е тоа што тој е изработен без странска помош, со што двете страни покажале дека ги решаваат прашањата без посредници.

Захариева и Хојт Ји разговарале и за актуелната политичка ситуација во регионот и за иницијативите на Бугарија во надворешната политика.


Могерини: Очигледно е дека целиот Балкан на крајот ќе биде дел од ЕУ


Блед, 5 септември, 2017 - 10:52 (META) 

Ние работиме на тоа секој наш поединечен партнер од Западен Балкан да има перспектива за членство во Европската Унија, изјави високата претставничка за надворешна и за безбедноста политика на ЕУ, Федерика Могерини, во своето обраќање на Бледскиот стратешки форум во Словенија.

Могерини истакна дека Балканот е веќе во Европа, дека се наоѓа во срцето на Европа и дека балканските народи сакаат и заслужуваат исти шанси, иста безбедност и исти права како и сите други граѓани на европскиот континент.

– За мене е очигледно дека целиот Балкан треба да биде и дека на крајот ќе биде дел од Европската Унија – истакна Могерини.

Таа потести дека тоа било ветено пред повеќе од 13 години во Солун и дека таа недвосмислена посветеност на сите 28 земји – членки на ЕУ е повторена во март годинава.

– Јас зацртав и како моја лична цел дека до крајот на мандатот на сегашната Европска комисија, односно за две години, ќе видиме практичен и мерлив напредок за сите наши шест партнери од Западен Балкан, напредок што ќе го направи нивниот пат кон ЕУ неповратен – порача Могерини.

Високата претставничка на ЕУ додаде дека имаше моменти на длабоки политички кризи во регионот, но дека дури и во така тешка година, сите европски партнери ги надминале тешкотиите и продолжуваат да напредуваат кон Европската Унија.

– Тоа го направија пред сè затоа што тоа од нив го бараат нивните граѓани, особено младиот и деловен свет. И тие тоа го направија во партнерство со нас, знаејќи дека можат секогаш да сметаат на нашето пријателство и припадност кон семејството – рече Могерини.

Во рамките на Бледскиот стратешки форум синоќа, средба со Могерини имаше и шефот на македонската дипломатија, Никола Димитров, на која било разговарано за европските приоритети на Македонија.

– Во регионот не треба да се плашиме да разговараме отворено за минатото, но не смееме да се дефокусираме од дискусијата за иднината, затоа што и иднината и вредностите што ги споделуваме се европски – истакнал Димитров.


Попоски: Потребен е рок за тоа колку една држава може да се држи како кандидат за ЕУ


Блед, 7 септември, 2016 - 13:40 (META) 

„Mора да се дефинира временска рамка, да се постават стандарди колку време може една држава да се држи како кандидат за членка на Европската Унија, до моментот на почнување и на завршување на пристапните преговори. Така ќе се обезбедат и регионалниот мир и безбедност на долг рок“, истакнал вицепремиерот и министер за надворешни работи, Никола Попоски, на панел-дискусијата за иднината на Балканот во ЕУ, што се одржа во рамките на Бледскиот стратешки форум во Словенија.

Попоски нагласил дека времето е клучен фактор во нашата (на Република Македонија) приказна, која трае повеќе години, а членството во ЕУ сè уште не е на повидок.

„Има различни стандарди за државите членки и кандидати. Некој ќе рече дека тоа е нормално и затоа е подобро да сме членка. Во меѓувреме, не можете да замислите на некоја држава од ЕУ да ѝ биде проблематизирано постоењето и основните права на нејзините граѓани, но за кандидат, тоа е сосема возможно… Не е решение да седнеме и само да се жалиме. Но, фер е да се направи една стратешка оценка во ЕУ за користа и за штетите од одложувањето на процесот. Дури и при услови на внатрешни предизвици, во ЕУ треба да се промовира интеграција на Балканот“, истакнал Попоски.

Според шефот на македонската дипломатија, денеска правилата за членство во ЕУ се изменети, а „најголемиот мировен проект на најстариот континент ги заостри критериумите на процесот за проширување“.

„Сега повеќе не е доволно само грубо воспоставување на функционална демократија и економија на пазарни принципи. Затоа, мора да се дефинира временска рамка, да се постават стандарди колку време може една држава да се држи како кандидат за членка, до моментот на почнување и на завршување на пристапните преговори. Така ќе се обезбедат и регионалниот мир и безбедност на долг рок“, истакнал Попоски.

Тој нагласил дека за Македонија, иако приказната со членството во Европската Унија трае пoдолго, сепак тaа претставува најдобрата гаранција за мирна и просперитетна иднина на Балканот.

Министерот Попоски, на Форумот во Блед остварил билатерални средби со министрите за надворешни работи на Босна и Херцеговина, Косово, Словенија, Србија и на Турција, како и со францускиот секретар за европски прашања, Харлем Дезир, американскиот помошник секретар за Европа, Хојт Брајан Ји, и со канадскиот парламентарен секретар на министерот за надворешни работи, Памела Голдсмит Џонс.