!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Полска ја победи ЕУ, тврди премиерката Шидло


Варшава, 14 ноември, 2017 - 17:02 (META) 

Полската премиерка Беата Шидло изјави дека нејзината Влада победила во спорот со ЕУ околу мигрантите, тврдејќи дека Унијата дури и го сменила својот став по тоа прашање.

Според Шилд, ЕУ го сменила ставот благодарение на влијанието на одлучниот и непоколеблив на Полска.

– Денеска во Европа на Полска се гледа како на земја ослободена од тероризам – вели Шидло.

Полска одби да прими бегалци според обврзувачкиот план на ЕУ за релокација на бегалци. Варшава како аргумент наведе дека со прифаќањето на муслиманските мигранти ќе се загрози безбедноста на земјата и нејзиниот католички идентитет.


Полскиот парламент го донесе новиот закон за Уставниот суд


Варшава, 7 јули, 2016 - 19:01 (META) 

Полскиот парламент денеска го усвоил новиот закон за Уставниот суд, во обид да ја одблокира работата на оваа важна институција, јавуваат светските агенции.

Поради контроверзните реформи во Уставниот суд, кои предзвикаа парализа во неговата работа, конзервативната полска влада, во која мнозинството го има Партијата на правото и правдата, беше остро критикувана од Европската Унија и од НАТО.

Парламентот денеска со мнозинство гласови го усвоил новиот закон, кој владата на премиерката Беата Шидло го претставила како компромисно решение на кое инсистира Европската комисија.

Со донесувањето на овој закон, како што пренесуваат медиумите, треба да заврши проценката на функционирањето на правниот систем во Полска, која Европската комисија ја почна во јануари годинава токму поради контроверзните реформи во Уставниот суд.

Реформите во Уставниот суд, поради кои Полска беше критикувана не само од Европска Унија, туку и од Советот на Европа, Обединетите нации, САД и од меѓународната организација на правници, според медиумите, се дел од потезите со кои Партијата на правото и правдата и премиерката Беата Шидло сакаат да ја зацврстат својата власт по победата на изборите во октомври минатата година.