Лидерот на СДСМ, Зоран Заев, заедно со Радмила Шекеринска и со Оливер Спасовски, денеска се сретна со амбасадорот на САД во Македонија, Џес Бејли.
Како што соопштуваат од СДСМ, на средбата се разговарало за ситуација во државата со кршењето на основните човекови права, за предизвиците за функционалност на државниот систем во услови на поклопеност од страна на власта и за нарушениот демократски амбиент во земјата.
– За жал, тие процеси се веќе подолг период сериозно нарушени и СДСМ, како најголема опозициска партија, има одговорност да ги врати уништените демократски вредности, поради кои луѓето ја напуштаат земјата, а Македонија назадува во евроатлантските перспективи – рекол Заев.
Раководството на СДСМ соопштило и дека прислушувањето и упадот во судството се мал дел од доказите за тоа како Груевски и неколку луѓе околу него, со своите незаконски и криминални активности, го погазиле уставниот поредок, со единствена цел – да воспостават контрола врз сè во државата и на тој начин да го обезбедат своето владеење.
– Тоа се сериозни докази што СДСМ има морална и законска обврска да ги сподели со јавноста, со крајна цел – нормализација на Македонија – му рекол Заев на Бејли.
