Преку издавање на четврта емисија на акции по пат на приватна понуда, од Владата на РСМ ќе одвојат дополнителни 15,7 милиони евра за Железници на РСМ-Транспорт. На овој начин, ќе се помогне работењето на државната железничка компанија, која има огромен долг од околу 64,9 милиони евра заклучно со првото полугодие од 2023. Од Комисијата за хартии од вредност информираа дека на 15-тата седница донеле одлука со која на државната железница ѝ даваат одобрение за да ја издадат емисијата на акции.
„Со четвртата емисија, Друштвото ќе издаде 962.913 обични акции при што продажната цена по акција е еднаква со номиналната и изнесува 1.000 денари по акција. Вкупната продажна вредност на емисијата e 962.913.000 денари. Друштвото издава хартии од вредност заради зголемување на основната главнина, односно заради создавање услови за непречено функционирање. Приватната понуда е наменета за познат купувач, постојниот единствен акционер – Влада на Република Северна Македонија, како институционален инвеститор“, стои во соопштението на Комисијата за хартии од вредност.
Државното железничко претпријатие е во голема криза, надвор од функција се укинатите патнички возови од Скопје кон Битола, Кичево, Табановце и Кочани. Воедно, речиси секој месец има штрајк на вработените во Железници на РСМ-Транспорт поради доцнење со исплатата на плати.
Инаку, Министерството за транспорт и врски за Мета.мк минатата недела објаснија дека годинава од државниот буџет досега биле префрлени околу 10 милиони евра за помош на патничкиот железнички сообраќај, како и за покривање на другите тековни трошоци. Лани биле трансферирани 15 милиони евра кон железничкото претпријатие.
