За помалку од 24 часа од почетокот на продажбата на електронските налепници за патарина во Бугарија, денеска до пладне биле продадени околу 300 такви вињети, јавуваат бугарските медиуми.

Бугарија ќе ги исфрли класичните вињети-налепници и воведува електронска наплата, која ќе се одвива од 1 јануари следната година. Цените на надоместокот остануваат истите, а новост што ќе ги интересира и македонските граѓани, со оглед на фактот дека голем дел патуваат за викенд во блиските зимски центри како Банско и Боровец, е воведувањето на викенд-вињета.

Со новиот систем со кој веќе нема потреба од лепење налепници на ветробранското стакло, туку електронски ќе се регистрира автомобилот според регистерската табличка, контролата за тоа кој платил за користење на патиштата ќе се одвива исто така електронски. Камери на патиштата и мобилни полициски екипи со камери ќе ги фотографиираат возилата и ќе ги внесуваат во системот. Ако се утврди дека некое фотографирано возило не платило патарина електронски, ќе биде сопрено од следната патрола на сообраќајната полиција или од полицијата во местото каде престојува или од полицијата или цариниците на граничен премин.

Целата постапка може да се направи преку соодветното веб-место, каде може да платите електронска вињета сега, а да ја активирате подоцна. Плаќањето е со дебитни или со кредитни картички. За постапката може да се информирате на осум јазици, меѓу кои се и српскиот и турскиот.

Исто така, на овој сајт или преку соодветната мобилна апликација, може постоечките хартиени вињети бесплатно да се претворат во електронски. Но нема да се казнуваат возилата со важечки вињети-налепници кои не се претворени во електронски сè до истекот на важноста на обичната вињета.

За да биде корисникот сигурен дека нема да има проблеми, треба да ги чува електронските писма со кои му се потврдува дека платил за патарина за определен период, односно еден викенд, една седмица, еден месец или подолго.

Електронскиот систем овозможува да се купат електронски вињети и преку веб-местото и преку терминали во некои трговски центри како и во сите центри на Агенцијата за патишта на Бугарија. Терминалите се на 8 јазици.

Цените се како и досегашните – за еден месец за автомобил и друго возило до 3,5 тони тежина се плаќа 30 лева, за една седмица 15 лева, а за цела година 97 лева.

Новост е викенд-вињетата, која ќе биде од најголем интерес на Македонците. Таа важи од пладне во петок до полноќ во недела и чини 10 лева.

Електронски вињети се воведуваат и за сите други возила, но тие ќе имаат различна цена. За товарните возила електронските вињети ќе важат до јули следната година, кога за нив ќе се воведе електронска наплата на патарина.