![Su-25 na ARM FOTO 21093139811_ec9af028a3_h by Rob Schleiffert at Flickr License](https://meta.mk/wp-content/uploads/2022/09/su-25-na-arm-foto-21093139811_ec9af028a3_h-by-rob-schleiffert-at-flickr-license-696x464.jpg)
Единствените борбени авиони што ги поседувала државата се четирите „Сухој СУ-25“, но не е вистина дека македонската армија ги добила како донација од Русија за време на воениот конфликт во 2001 година. Армијата овие борбени авиони ги купи, и тоа од Украина, а не ги доби како донација. Русија нема никаква поврзаност со овие четири авиони, пишува „Вистиномер“ во својата анализа.
Текстот подолу го пренесуваме во целост:
На објава на социјалната мрежа Фејсбук се тврди дека борбените авиони кои С.Македонија ѝ ги донираше на Украина како помош при воената агресија на Русија, се, всушност, донација од Русија. Ова е невистинита информација.
Во објавата се вели:
Во 2001та година, Русија ни даде четири Сухои СУ-25 за борба против Учк.
Е сега ние ги дадовме тие авиони на Украина,за да ја бомбардираат Русија – истите тие авиони кои не спасија нас.
Каде ни е честа?
Станавме за потсмев во светот,на пријателите им враќаме со бомби…
Шетајќи по рускиот свет,се срамам да се претставам дека сум од Македонија
Гробари на се македонско,
се продадовте,се уништивте,со сите не скаравте
Единствените борбени авиони што ги поседувала државата се четирите „Сухој СУ-25“, но не е вистина дека македонската армија ги добила како донација од Русија за време на воениот конфликт во 2001 година. Армијата овие борбени авиони ги купи, и тоа од Украина, а не ги доби како донација. Русија нема никаква поврзаност со овие четири авиони.
Во јуни 2001 година, во екот на конфликтот, Македонија купи четири борбени авиони „Сухој СУ-25“ од Украина, три едноседи и еден двосед. Авионите се конструирани за блиска поддршка на пешадијата. Авионите на АРМ имаа неколку борбени летови во конфликтот во 2001 година, како поддршка на копнените дејства на безбедносните сили.
Во пролетта 2003 година Македонија декларира дека во формацискиот состав на АРМ веќе нема потреба од борбените авиони, а во 2004 година авионите беа приземјени и конзервирани. Следната година Министерството за одбрана и формално ги отпиша авионите од евиденцијата на опремата и вооружувањето на АРМ.
За време на конфликтот во 2001 година, Украина која беше еден од главните поддржувачи на македонската армија, ја презеде обуката на македонските пилоти во своите академии, ги поддржа воздухопловните сили и пружи помош за обука на македонската полиција и специјалните сили. Украина дури понуди помош за сервисирање на македонската воена опрема и достави повеќе хеликоптери, транспортни и борбени, четири авиони СУ-25 и друга опрема за копнената војска.
Поранешниот министер, пратеник и амбасадор Марјан Ѓорчев, кој беше шеф на македонската делегација која во 2001 година замина во Украина за да договори набавка на воена опрема и оружје, за Фокус сведочи како дошло до соработката меѓу двете земји тешка околу милијарда евра.
Тој објаснува дека со издавање банкарска гаранција од високо солвентна европска банка, Македонија набавила повеќе најсовремени хеликоптери во тоа време (Ми-24, Ми-8 и Ми-17) и четири борбени авиони (Су-25), додека истовремено било договорено осовременување на тенковите Т-55, се набавил ракетниот одбранбен систем „Град”, се обезбедила достава на повеќе видови лесно-пешадиско оружје и опрема итн.
Дел од македонските медиуми објавија дека по донацијата на тенкови за Украина, четирите воени авиони „СУ-25“ што Северна Македонија ги набави за време на конфликтот во 2001 година, се донирани на Киев. Станува збор за авионите што се призејмени од 2004 година и кои С. Македонија во меѓувреме планираше да ги продаде.
Ваквата информација сè уште не е потврдена официјално од Министерството за одбрана, од каде информираа дека се донесени три одлуки, чија содржина сè уште е тајна.
Точните детали за сите три одлуки, нивната содржина и објаснување ќе бидат декласифицирани и транспарентно објавени. Со досега донесените одлуки не се нарушува борбената готовност на нашата армија, наведуваат од Министерството за одбрана.
Оттаму, оценуваме дека објавата што е предмет на оваа рецензија е невистинита и е дел од една поширока кампања заснована на дезинформации во врска со руско-украинската ситуација.
***
Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.