Министерството за труд и социјална политика во реакција до медиумите вели дека лажна вест е дека државата ќе гради станови за бегалците и дека тие ќе остануваат во Македонија.
Од министерството велат дека нема да се градат кампови за бегалци, нема да им се даваат државјанства и дека Македонија е држава која е транзитна станица на бегалците.
„Kако земја членка на Обединетите нации, нашата земја ќе им помогне на бегалците на нивниот пат кон крајните дестинации, согласно меѓународните стандарди и ратификуваната Конвенција за правата на бегалците од 1994 година. Предлог-стратегијата за интеграција на бегалци и на странци 2017-2027 е продолжение на иста таква стратегија за периодот 2009-2015 година, донесена од претходната влада на ВМРО-ДПМНЕ. Документот нема никакво обврзувачко дејство и тие кои во минатото ја потпишале оваа стратегија го знаат овој факт“, велат од Министерството.
Од таму велат дека секоја информација во поинаква насока е лага, неточна и невистинита и го осудија, како што велат, наменското ширење страв и ксенофобија кај граѓаните.
