Британскиот премиер Дејвид Камерон денеска изјави дека исламските ектремисти ѝ објавиле војна на Велика Британија, наведувајќи дека од Британија ќе испрати воен транспортен авион за Тунис заради евакуција на загинатите и на повредените во терористичкиот напад во Сус.
За Камерон тоа е застрашувачки напад кој ја шокирал цела нација.
– Ние (Британците) бевме мета. Тие ни објавија војна – рече Камерон и вети целосна истрага за тоа што се случило во туниското летувалиште пред три дена.
Камерон рекол дека министерот за внатрешни работи Тереза Меј ќе отпатува во Тунис заедно со претставникот од министерството за надворешни работи, Тобијас Елвуд.
Од Британија, досега, во Тунис испратени се 16 детективи за да помогнат во истрагата, додека 400 полицајци разговараат со британските туристи кои биле на местото за време на нападот.
Во Лондон денеска знамињата се на половина копје во знак на сочувство со семејствата на жртвите.
