Доколку се врати контролата на границите во Европа во државите кои биле дел од шенгенската зона, тоа би ги чинело 110 милијарди евра во наредните десет години, соопшти „Франс стратеџи“, кој е официјален институт на француската влада.
Шенгенскиот договор е главна централна точка на европските интеграции, но под притисок на избирачите загрижени поради незапаметен прилив на мигранти од Африка и од Блискиот Исток, неколку влади вовеле привремена контрола на границите со другите земји.
Студијата на институтот „Франс стратеџи“ наведува дека трајното укинување на зоната на слободно движење ќе го намали обемот на туризам и на трговија и Европа тоа би ја чинело 0,8 проценти од вкупното економско производство во следните 10 години.
Франција тоа би ја чинело меѓу една и две милијарди евра краткорочно, а 10 милијарди евра во следните 10 години, што е 0,5 проценти од домашниот бруто-производ, наведуваат авторите на студијата.
– Долгорочно цената на постојаната гранична контрола би била еквивалентна на данокот од 3 проценти на трговијата меѓу земјите на шенгенскаата зона, што би довело до намалување на трговскиот обем меѓу 10 и 20 проценти – се вели во студијата.
Шест од 26 членки на шенген-зоната, вклучувајќи ја и Германија, повторно вовеле привремена контрола на границата поради доаѓање на стотина илјади мигранти во богатите земји на ЕУ.
