Ана Павловска-Данева беше изгласана за уставна судијка на денешната собраниска седница, со 65 гласа „за“ и 26 „против“. Таа е деветтиот уставен судија, со што се комплетира актуелниот состав на Уставниот суд.
По избирањетo на Павловска-Данева, пратениците наминаа следната точка – изборот за јавен обвинител. Владата предложи еден кандидат – Љупчо Коцевски.
Инаку, Павловска-Данева е и поранешна пратеничка на СДСМ.
Како што стои во нејзината биографија, таа студиите ги започнала на Правниот факултет при Московскиот Државен Универзитет „М.В. Ломоносов“ во Москва, а во 1993 година дипломирала на Правниот факултет при Универзитетот „Св. Кирил и Методиј“ во Скопје. Магистрирала во 1998 година на тема „Омбудсман – заштитник на правата и слободите на граѓаните“. Истата година била избрана за помлад асистент на научната област Управно право на Правниот факултет при Универзитетот „Св. Кирил и Методиј“, а веќе следната 1999 година била избрана за асистент. Во 2004 година, се стекнала со научен степен доктор на правни науки, со одбрана на докторската дисертација на тема „Управни договори“ и е избрана за доцент на научната област управно право на Правниот факултет „Јустинијан Први“, по што напредува во звањата и станува вонреден професор (2009 година) и редовен професор (2013 година). Таа е и постојан предавач во Академијата за судии и јавни обвинители „Павел Шатев“.
Предлог за уставен судија претходно беше Љубомир Jовески. На 24 јануари СДСМ ја повлече неговата кандидатура.
